大鱷搶胡
2016年06月14日
A股入摩根士丹利指數是否成功明日就會揭盅，不過，炒作呢個因素嘅資金就有提早退潮嘅跡象，有消息仲話包括索羅斯等大鱷，仲會趁呢個機會開餐。
五窮月唔窮，甚至六絕月頭嗰幾日都唔絕，一大理由就係炒呢個月A股入摩有結果。本來市場
對成功入摩睇法比較樂觀，但隨着傳出中央叫停匯改等消息，市場就開始降溫。到上星期尾，雖然阿爺特別整劑QFII加碼款待美國佬，盡顯入摩誠意，但仍無阻淡友攻勢。有中環茶友話，雖然家入摩與否唔講得死，但淡友已經預咗若然入摩失敗會插低個市，就算係入摩成功，都會借好消息出貨，反正入摩成功，初期比重都唔大，一樣有唱淡藉口。
周三D DAY前放淡風
淡友將星期三當係D DAY揮軍，未開打前夕，已經有風聲漏出。上星期有報道指國際大鱷索羅斯睇淡美股，出山沽空大市，昨日再傳索羅斯駐港基金SFM等，喺新加坡富時中國A50期指加注，對賭周三(15日)A股入摩不成。新加坡富時中國A50期指未平創合約，於上月23日突破10萬張，至上周異常地增至逾57萬張。
MSCI指數將於本港時間周三(15日)早上5時，公佈是否將A股納入其新興市場指數。由於摩根士丹利指數公司在宣佈決定後只舉行電話會議，未有召開新聞發佈會，於是市場懷疑A股「入摩」可能性。
有近年留意對沖基金動向嘅財金高人拆局，話呢啲沽空消息流傳，好有機會係大鱷嘅心理攻勢，配合銀彈轟炸做嘢。
佢話，對沖基金近幾年都難搵食咗，令佢哋表現遜色，主要原因係呢行以前咁好搵，多咗人入行，形成競爭。以前大鱷要等到個市偏離合理價值好遠先出手，後來就愈來愈多人偷步搵食，情況好似漁民打魚，由於捉魚嘅人多咗，於是未等條魚大就把魚撈起嚟食之哉。當漁民用嚟撈魚嘅漁網的網孔愈嚟愈細，漁獲就一條細過一條，呢個情況喺投資市場就變成頻密但幅度較細嘅波動，皆因未等到大茶飯，有人已經搶胡。以前對沖基金可能等入摩失敗先出來做世界，家就預先放定料，然後就郁手。
由於全球股市氣氛轉差，咁啱內地一連兩日在上海舉行「陸家嘴論壇」，原訂在論壇發表講話的人民銀行行長周小川、中銀監主席尚福林，以及中證監新任主席劉士余，均未按原定議程出席論壇。咁氣氛下滬指開盤跌逾1%，全日反覆走低，上證指數收報2833點，跌94點或3.2%；深成指報9862點，跌454點或4.4%，券商同內險股都表現不濟。
港股喺淡聲淡氣下全日捱沽，恒指一度插近612點，收市恒指報20512點，下挫529點；國企指數收報8619點，下滑212點，成交651億元。藍籌股近乎全軍覆沒。累升唔少嘅騰訊(700) 跌穿170元關，全日挫3.2%，收169.5元，唯獨領展(823) 跌市仲升0.59%，收造51.05元；聯想集團(992) 漲0.41%，收4.9元；是藍籌股兩隻錄得升幅的股份。由於英國調查機構講到「脫歐」機會上升，拖冧英鎊匯價上周五顯著下挫，跌至七星期低位，匯控(005) 與渣打(2888) 急挫。匯控挫2.94%，造47.9元；渣打急降4.39%，造56.65元。
九倉賣產不升反跌
九倉(004) 放售電訊業務，反映集團整合資源。好多公司賣嘢股價升，但呢次反應就唔係咁。九倉母公司會德豐(020) 沽壓巨大，收造34.75元，大跌7.3%；九倉股價則跌2.74%，造44.35元。
呢排大鱷講到股會跌、債會跌，咁啲錢有乜好買呢？於是有啲錢買吓金。由於黄金市場同貨幣、債市比規模細好多，部份熱錢流入已足夠令金市有反應。借住市場避險情緒上升，金價昨午升穿每安士1280美元關，推動招金股價逆市造好，招金(1818) 升3.33%，造7.36元；紫金(2899) 漲0.88%，造2.3元。至於SPDR金ETF(2840) 也升1.33%，造951.5元；但個別黃金股逆跌，主要係多咗掛鈎嘅ETF，炒作熱錢寧願買呢啲容易理解嘅工具，搞到三、四線金礦股少咗人捧場。
陸羽仁
金融High Tea 舊文
來源 source: http://hdfin.stheadline.com