金融High Tea 2016年6月28日
天堂股和地獄股
2016年06月28日
港股昨日市場話題唔係個市跌定升，而係鬧爆英國首相卡梅倫。
英國搞脫歐公投，結果搞出大頭佛，情況有少少混亂，有數以百萬計選民要求再嚟過，蘇格蘭人話其他人想脫歐，但我哋想留歐，又話要搞公投，英國政局七國咁亂。英國在無準備下忽然一脫，就真係害死人。
有個大孖沙身邊紅人，講起始作俑者嘅卡梅倫就把幾火，怒斥佢唯恐天下不亂，無事搵事嚟搞。紅人話，本來根本就無太大壓力要搞乜公投，政客選舉時講過公投的承諾亦大可照拖，根本係卡梅倫呢條友自己諗埋呢啲蠶蟲計，由呢個例子，睇到一個人有權唔識用，就可以搞到天下大亂，簡單嚟講，就係一人喪邦。如果睇番投票結果，蘇格蘭幾乎所有選區都係選擇留歐，家被逼跟隨脫歐，可想而知獨立嘅欲望有幾強，未來蘇格蘭問題繼續係英國政治炸彈。
人仔順勢小貶
英國搞出大頭佛，但對內地未必係壞事，星展香港高級經濟師梁兆基認為，英國「脫歐」令全球局勢變得混亂，股市匯市波動，令美國聯儲局今年加息機會很低，甚至無機會加息，間接令到內地貨幣政策多咗空間。佢解釋，脫歐消息影響大部份貨幣兌美元大幅下跌，由於其他貨幣貶值幅度遠大於人民幣，令人仔有更多空間慢慢貶值，市場也不像去年把貶值解讀為壞事。
按中國外匯交易中心公佈，人民幣兌美元即期收挫245點子，報6.6393兌1美元，盤中跌破6.64關口；此外，中間價大跌599點，創五年半低位，反映人仔跟從其他貨幣調低。
我聽內地專家講，人行的操作原則係人仔既要跟一籃子貨幣走，又要兌美元保持相對穩定。做法係美元升其他主要外幣跌時，人仔跟外幣匯貶吓，但又唔會跟足。好似家咁，唔好畀「創5年半低位」幾粒字嚇親你，佢相對歐羅只係貶好少。
內銀房託逆市升
外圍立立亂，A股反而相對穩定，所以昨日拗腰勁升，滬深兩市飆1.45%及2.27%，恒指曾挫近三百點後，都跟住內地回穩。恒生指數收報20227點，下跌31點；國企指數收報8567點，升37點，成交金額626億元。總部設在英國的匯豐控股(005) 繼續捱沽，收造46.65元，跌1.7%；渣打集團(2888) 降1%，造57.15元。
昨日焦點不在匯控、渣打，反而係天堂股和地獄股的逆向走勢。內銀跟內地市升，工行(1398) 大升2.3%，但都唔夠房託基金(REITs)升得勁。由於美國加息步伐被打亂，加上摩根士丹利出報告睇好REITs，領展(823) 破頂創上市高，最高見51.8元，收造51.65元，揚4%，是升幅最大藍籌；置富產業(778) 升1.9%，造9.19元；冠君產業(2778) 抽高4.6%，造4.33元。美國10年債息1.48厘，呢啲係REITs大炒特炒的日子。
而在英有大量投資長和系唔係幾掂，長和(001) 股價挫4%，造83.5元；旗下長江基建(1038) 跌4.9%，造66.5元。揸住不同股份，有天堂和地獄之別。
匯豐證券就發表報告，料英鎊兌美元年底會低見1.2，按年跌18%(即兌港紙見9.3元，有仔女在英國讀書的英鎊用家會好開心)。長江基建(1038) 及電能實業(006) 由英國業務的盈利貢獻分別達73%及62%，由於上述兩間公司以港元結算，預計英鎊下跌會對集團有所影響。不過，匯證相信不利因素已經反映，同時英國通脹料可帶動集團盈利上升。投資者可趁長建和電能弱勢低吸，因有潛在收購機會，其中看好電能多於長建，齊予「買入」評級，但考慮匯率因素，將電能和長建目標價分別由85元和85元，降至78元及77元(昨收68.15元)。
結論係天堂股雖好，已經升咗好多，怕佢近頂。地獄股慘啲，但跌咗咁多，小心搵吓等吓，可能有投資機會。
陸羽仁
金融High Tea 舊文
來源 source: http://hdfin.stheadline.com