金融High Tea 2016年6月3日
瘦身股價升
2016年06月03日
早市傳來東亞(023) 裁員消息，銀行界裁員已經不是新鮮事物，但過去都以跨國銀行居多，本地銀行業過去幾年表現良好，所以就算國際銀行裁員，香港都可保無恙，或者至少手輕啲。東亞在海外業務唔多，生意主要集中係中港兩地。
非執董沽東亞可理解
今次裁員重災區係證券業務，再加其他範圍的員工。經過呢次減人，基本上東亞證券部門已減人減得七七八八，呢個反映咗經紀業自動化兼佣金不斷下調的結果。東亞同好多老闆一樣，心態係無必要唔想郁員工，到生意真係唔得就唯有郁手。
證券業務早已成為雞肋，有行內人坦言，現時做生意收「一滴」(百分之零點一)佣金，真係燈油火臘都蝕埋，只有靠做孖展賺錢，但今年以來新股表現係「大個隻、死個隻」，好多散戶都唔敢借孖展買新股，經紀業務仲難做。以前經紀可以教吓路，等啲客多啲買賣，現時通街財演，又有唔同網站提供資訊，經紀中介人角色可有可無，銀行要開刀，佢哋新第一個被人劈。現代經濟產業不斷轉型係新常態，好難再話一份工打到老，做打工仔只能時刻武裝自己。
睇番東亞2015年度全年業績，純利為 55.2億元，按年跌17.1%，今年上半年經濟放緩漸趨明顯，相信經營壓力唔細，呢排非執董李國仕(李國寶堂細佬)不斷減持股份，市場都幾側目。
裁員消息公佈後，東亞股價不跌反升，收報28.9元，升1.2%。東亞年初插過去20.9元，與昨日收市價比較反彈咗接近40%，現時市盈率14.9倍，息率3厘，但相信今年盈利同派息都會有倒退。從營運數字睇，現價吸引力一般，最大吸引力係佢市價低過帳面值，但除非佢係賣盤，否則呢個價值唔易體現。由於反彈咗咁多，加上就算裁員都未必扭轉到盈利倒退命運，非執董若然唔想長揸所有股份，賣咁啲貨都可以理解啦。
中銀買東盟資產惹戒心
本地銀行界另一單消息，係評級機構穆迪發表報告，佢對中銀香港(2388) 各項評估大致維持不變之餘，提到出售南商對其信用品質有正面影響，因銀行可自交易中大幅獲利，估計約佔其去年底股本的17%，同時減少風險加權資產19%，有形普通股權益/風險加權資產比率約為20%，成香港同業中資本水平最強的銀行之一。
同時，穆迪仲認為，未來中銀香港面對具挑戰性的營運環境，同時收購母行中行(3988) 東盟資產，將增加其對風險較高的中國與東盟國企業的敞口，仲話對東盟國家的宏觀因素評估大多低於香港。中銀香港出售南商後，又話會出售另一間附屬銀行，套現除咗加強資本，小股東仲憧憬佢會派特別息。若然套現所得係用嚟買阿媽係東盟資產，一來要睇作價；二來要睇對派息影響，唔排除有關消息至少係初期會被理解為利淡，所以要留意有關進展嘞。
昨早由於有東亞裁員消息，恒指一度窒住，午後東亞股價回升，恒指收市亦升98點，收報20859點；國指收報8756點，漲48點，成交579億元。
聯想集團(992) 被谷歌減持，昨跌4%，拖住同系神州控股(861) 跌7.6%，炒神州控股有收購戰的股民宜定止蝕位，以免股份急插資金被鎖死。
陸羽仁
金融High Tea 舊文
來源 source: http://hdfin.stheadline.com