異動空間：逆流而上航運股
■海豐國際過去四年盈利穩步增長；圖為集團副主席兼執行董事楊現祥。 資料圖片
深港通無限輪迴但繼續有得炒，土炮券商股仲升得幾狼嚇，證明炒鬼活躍番，部份蟹貨鬆綁亦帶來新資金。朝早跌唔落，午後就挾上去，大家都係摸著石頭過河，向上繼續尋頂。不過，部份大市值、但盈利銷
售成疑的毫子股成為沽空機構的狙擊目標，幾日就有一隻洗倉，最新係華瀚健康（587），急瀉三成後停牌，令細股氣氛甚差。
呢種兩極環境下，經紀戰友都話散戶大多唔敢入市。「不如建議佢哋炒大價股？」戰友答謂：「有呀！但無咩人落搭。」散戶一般資金較少，想博快錢谷大個本，大價股多數嫌太慢，但呢轉升浪剛好相反，指數成份股、市值大、深度夠，就多大戶參與，反之就乏人問津，如果唔知點揀，不如就買恒生H股ETF（2828），追落後潛力較大。
經濟低迷，航運股近年步入寒冬，但海豐國際（1308）過去四年盈利仍穩步增長，可見非池中物！關鍵在於集團海上及陸上物流兼備，分佔去年收入57%及43%，分散風險之餘亦受惠內地網購持續增長。該股下周五公佈中期業績，股價周三突然破位，春江鴨進場，業績隨時有驚喜！
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com