中環在線──
李寧：日本奪金是應該的
■「體操王子」李寧同意奧運嘅核心係競技精神，「失金」絕對唔係冇所謂。
里約奧運會上，中國隊頻頻失威，尤其係男子體操項目，過去兩屆團體賽拎冠軍嘅中國隊，今屆只係得銅牌，輸咗畀日本同俄羅斯。就連李寧（2331）老闆、昔日「體操王子」李寧都話，對中國
隊拎唔到金牌有啲失望，不過，日本隊之前兩屆表現好，今屆奪金都係「應該的」。
李寧公司噚日在港舉行業績會，咁啱呢排人人講緊奧運，當然要問李寧點睇喇，好似華華呢啲外行人，好難評論中國隊得唔得，李寧係「體操王子」，出自佢把口嘅話，當然唔同。
認同金牌至上
眾所周知，一面金牌對中國嚟講，是多麼的重要，李寧被問到，點睇呢種「金牌至上」嘅諗法，佢就好坦白咁講，十分認同呢種想法，佢強調「沒有金牌就沒有奧運」。而且，奧運嘅核心就係競技精神，「失金」絕對唔係冇所謂。
李寧之後又補多句，就算拎唔到第一，都應該要鼓勵番一班出盡力嘅運動員。此時此刻，對於兩年前痛失國家隊體操贊助嘅李寧，都應該有另一層體會。
不過，暫時嚟講，奧運最hit話題，並非體操隊，而係有種清泉叫做傅園慧，出盡「洪荒之力」嘅佢，冇攞金牌，但率性樂觀，佢嗰份體育精神認真可嘉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com