自成一格：
奧運完巴西經濟一定GG？
■主辦國搞完奧運之後，經濟多數會現大衰退。 資料圖片
自古以來，奧運火炬手將刺激經濟的聖火點亮，主辦國經濟一飛衝天。不過，呢個世界邊有咁大隻蛤乸隨街跳吖，市場一直流傳「後奧運效應」，主辦國搞完奧運之後，經濟就會出現大衰退。
市場人士認為，搞個奧
運其實都係預支未來幾年的增長。事緣是主辦國從籌備奧運開始，一直加大基建發展及旅遊業，例如建造新的奧運場館、選手村及其他周邊配套，務求奧運可以順順利利舉行，順便振興當地經濟及推廣旅遊業。
為咗搞得風風光光，好多時主辦國洗濕咗個頭之後就越搞越大，但投資的回報往往低於開支。基建項目完成、旅客happy完、消費谷完，一切還原基本步，嗰啲大到飛起的運動場得個擺字，仲要年年花錢做保養，仲未計失業率又升，GDP谷大咗個基數之後難再持續增長，結果本末倒置，搞到經濟衰退。
據歷史資料，奧運史上找得最耐數的主辦城市的定必是加拿大的蒙特利爾。1976年，在蒙特利爾舉行的奧運會成本竟然超出預算20倍。到最後邊個埋單呢？當然是蒙特利爾的公民，從此當地徵多咗個新稅叫「奧運特別稅」，仲要一交就交咗30年，直至2006年先找完條數，認真慘慘豬！
除了經濟之外，奧運前後股市亦會炒作旅遊及或基建等股份。巴西股市去年隨環球經濟轉差，以及政治醜聞影響而急跌；不過今年受奧運帶動，巴西聖保羅指數已經升逾31%，當地貨幣雷亞爾亦升值26%。到底現階段為強弓之末抑或下半年仍可力保不失，就要睇嚇奧運聖火燃燒過後，「後奧運效應」的威力有多大了。
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com