金手指 - 孫柏文 2016年8月16日
金手指：不問價追靄華押業
■傳有資金準備用市賬率三倍洽購靄華。 資料圖片
年多前畀過孫柏文幾隻細價股（我亦同大家以「不問價追」分享，最後倍升）嘅十億身家老炒家，上周忽然來電。老炒家：「上次同你喺脫歐公投前傾偈，你建議嗰招我做足。你叫我下晝一點買，真係一點零四分見底後升600點。正呀！」
原來，老炒家搵我話要報恩，叫我買靄華押業（1319）。佢話：「啲北大人開會，剷走共青團系統，有好多晾咗喺到嘅計劃應該會開綠燈。」佢話，太子黨想印鈔，不過共青啲官員驚人民幣冧價。不過現實係大陸開始真大鑊，國退民退，所以達成共識，增加貨幣供應，同時繼續外滙管制，不過要引入更多資金分配渠道，特別係對啲中小企、小商人有用，全國落實。
特別係各省市嘅樓價上升，如果容易啲靠磚頭變現金，就會令樓去庫存更易。不過呢個一向唔係大陸強行，所以想睇可唔可以買呢啲知識番來。靄華，老牌港企，以前就主力做當舖，𠵱家主要靠做用樓抵押嘅短期高息貸款。雖佢同我講過兩次買靄華，而兩次之後一個月都升唔少，不過未講到咁大話可能會被收購。佢話佢聽到「有人已被批攞資金出來」用市賬率3倍洽購，即1元。周一靄華收0.5元。
我話：「我寫後炒上，咪禍單嘢？同有幾堅先？」佢就一句：「有咁勁先算啦！同埋隻嘢之前驚香港樓價跌，啲人走數攞唔番啲錢，𠵱家樓價升番，股價都要追啲地產股啦！」對上兩次叫大家買，之後一個月內都升至少兩成。今次再叫大家不問價追靄華押業！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com