智取大市：
睇好Yen只因動力
■日圓仲有機會繼續升上去，值得睇好。 資料圖片
早排小弟有一個諗頭，就係食糊後將大部份資金轉做日圓，但礙於自己智商嘅問題，log in股票戶口後，又唔太識如何將港幣兌換成日圓，結果㩒一輪掣就放棄咗。話說日圓由7.3算升到7.6算，錯失賬面輕易賺4個巴仙嘅
機會，仲要日圓或繼續升。
除咗Yen值得睇好，想講嘅係，炒股炒滙炒乜都好，捕捉機會嘅其中一項重要因素，就係動力。日圓喺放水、刺激經濟措施等利淡消息之下都升，證明動力充足，後市未升完，每次無厘頭轉弱，都係吸納機會。
正如一隻股票升市跌市都升，呢啲就係上升動力，反映嘅係應有價值遠遠過於目前市場定價，股價只會向上修正，直到股價成功達到佢嘅最終應有價值為止。
呢類股票，等如基金大戶嘅底褲，每當跌市跌到最谷底時，先驚到連底褲都要掟出嚟，呢個亦係跌市見底嘅徵兆，因為最好嘅股都沽埋，手上仲有乜貨可沽？
當你捉小精靈時，捉雀仔、蟲仔，識捉一定用紅色精靈球，但眼前見到一隻比卡超，你就可能動用你平時唔捨得用嘅黑色ultra ball。兩年前嘅騰訊（700），都係呢類股，𠵱家？唔算了，因感覺上不再強到無朋友。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com