中環迷你裙：賺錢要鬥快割禾青
■中交建去年業績理想，在國指成份股中值博機會較高；圖為集團主席劉起濤。 資料圖片
8號風球，打工仔開心賺得半天假，更多好似Samantha咁，家裏早已成為半個辦公室，公司現不現身已不是問題，屬於你的工作還是屬於你的。8號又好，放假又好，都係會
被揾到，這股洪流誰也不能置身事外，股票市場也一樣，生態、潮流話變就變，上月炒緊最穩陣的高息股，今個月就挾最殘的國指，「有冇搞錯？又變？」市場從來沒搞錯，提高自己的適應力是必要。
恒指周一揚逾200點，中國概念再次抬頭，要尋根究底的話，就是全球遊資太多，試幻想一下，將自己的睡房封上膠條，鋪上膠布，再注滿水，水在同一個地方流動，出入不能，但當水注得越滿，一個少動作也能無風起浪。全球經濟唔好，但諷刺的是錢太多，錢不投諸實質經濟，僅能炒出炒入，這視為虛火，話明係虛火，最重要係識得割禾青，畀人捉番住就食都冇得食㗎喇。
某大券商散戶指數周一僅得22，挾倉難免，短線操作可以，但最緊要識走鬼，滬指走勢不太理想，油價又再次失守40美元，外圍仍然腳震震，澳洲減息去到歷史低位，可見一斑。今次主題炒國指，最簡單就在國指成份股中尋，Sam要揀向來揀隻質地較好。本月是業績期，恐防落咗妝後原來業績毀容，咁就弊傢夥。中交建（1800）去年業績理想，在雲雲國指成份股中值博機會較高。
從事基建建設、基建設計、疏浚及裝備製造業務的中交建，第一季新簽合同額1,078.84億人民幣，按年增長2.19%，遜於市場預期。不過，海外業務有望下半年發力，呢瓣先係中交建盈利的主要動力；中國政府公私營合作（PPP）項目將推動下半年內地市場的新簽合同增長；加上「一帶一路」戰略上，為中交建帶來很大業務機會。該股過去三個月股價表現硬淨，近日蓄勢待破250日線，可於現價買入，首站先睇9.65元。
Samantha
http://fb.com/stocksamantha
本欄逢周三刊出
Samantha
中環迷你裙 - Samantha 舊文
來源 source: http://hk.apple.nextmedia.com