Money Walker：抗衡劣食靠廉航
■廉航普及下，港人寧可減少本土消費，儲錢外遊。 資料圖片
好多人話香港有好多美食，但就要用心搵，是但食就要有中伏嘅準備。
劣食育成原因隨手都可列舉十數個，貴租下被迫偷工減料、大集團頂死不惜工本認真製作嘅小店、大陸食材低質點煮都
難食、老店老闆賣舖唔做、飲食業待遇差留唔住好員工……總之台灣嘅平民美食夜市無法在港複製，百年美食老店亦無條件在港孕育。
搵食行遠啲，往往都要走入工廠區或遠離大街之處。但無論間食店喺邊，賣乜菜式，質素好多時都只能維持一時，因為當間舖得到傳媒關注同網民熱捧，大都不出幾個發展。第一，畀業主瘋狂加租後死亡；第二，間食店想開分店賺多啲；第三，計劃做大佢搞上市。
食肆如果只係開一、兩間分店都仲ok，最怕見到分店以幾何式擴張，因結果大多係食品質素難以控制。至於鋪路上市就更恐怖，食肆點樣被上市黨搞到一身蟻最終收皮，上網搵下啲報道就知。
話時話，講咗好耐嘅美食車先導計劃，入圍名單日前揭盅，美食車擺到明走高檔路線做遊客生意，價錢同菜式離地是常識吧？不過政府有政府用離地美食車吸引遊客，年輕一代有年輕一代放眼海外搵食。喺廉航普及下，大家寧可減少本土消費，儲錢一年短線遊三幾轉日、台、韓，而外遊其中一個重點，當然係到當地平民食府「食好西」。
最近幾季本土消費市道差，但港人外遊消費反增，呢個現象反映港人有錢寧願拎去旅行享受，唔知背後又關唔關事食物質素事呢？
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com