銀行難做不如賣盤
2016年08月03日
港股打風無市，今日重開主要睇外圍表現。停市期間，內地股市喺2900點有番啲抗跌力，上證指數收報2971點，升17點；深成指數收報10250點，升65點。到歐洲開市表現就麻麻，歐洲同英國股市都偏軟。
英國脫歐成為事實，但點樣脫法
仲未知。外電報道，匯控(005) 等大銀行，家同英國央行講緊數，要求將商業銀行同投資銀行分開，以令佢哋較易適應脫歐後嘅歐洲監管要求，英國央行對於是否作出寬限未表態。可以估計嘅係，大銀行一定大力鍊番英國政府，因為搞出脫歐最大劑，最受影響係銀行業，將來歐盟肯定要求同區內嘅交易，要係去番歐盟國家結算。如果英國唔讓步，咁大銀行最終有可能要撤離倫敦，如果英國政府肯讓步，咁就對銀行嘅影響就可以減少。
股東注視匯控派息
匯豐控股今日就會公佈上半年度業績，屆時可能會對總部問題同脫歐影響提出管理層嘅睇法。至於業績方面，綜合市場分析預測，集團第二季稅前利潤38億美元，按年倒退42%，較首季的61億美元，跌37%。銀行受到全球信貸需求疲弱影響，生意唔好做，匯控上半年表現，估計幾受俗稱「炒房」的業務影響。德意志估計，匯控「炒房」在環球市況第二季略為好轉，會趨向穩健，預測集團中期純利按年少賺33%。券商焦點放在英國公投脫歐後，會否影響匯控派息政策。而受外圍環境影響，下半年的業績表現或會轉差。
匯控家派緊高息，業績高低之下，股東最着緊仲係派息，尤其係脫歐會唔會影響派息政策，匯控家息率係7.8厘，若然派息顯著減少，股價壓力亦大。高盛預期佢普通股權一級資本比率(CET1)維持平穩，為11.9%。若完成出售巴西業務，有關比率或進一步升至12.5%。喺咁狀況下，中期息可以維持每股10美仙。
脫歐唔止影響到大笨象，仲連中廣核集團參建英國核電廠的計劃都受阻。女首相文翠珊上任首個大動作，就係叫停檢討呢個項目，此舉令人關注新首相同內地嘅關係。傳統上，美英係親密戰友，不過，啱啱落台嘅首相卡梅倫，就同中國走得好埋，喺佢任內英國率先表態加入亞投行，後來習近平訪英，雙方簽署核電站計劃，為中國輸出核電技術行出咗重要一步。
不過，一劑脫歐，結果搞到歐盟散晒之餘，仲令卡梅倫呢個中國之友落埋台。美國佬搞垮咗敍利亞，難民問題令到歐洲亂過七國，跟住英國脫歐跟番美國走，難怪好多人都話美國做咗大贏家。呢個亦解釋咗美元、美股點解係全球主要市場最強，至於今次叫停核電廠事件，雖然唔直接影響上市嘅內地核電股，但概念上就肯定打窒佢哋啦。
香港巨企都話返內地發債
講開銀行生意難做。九倉(004) 昨日就公佈，公司正式申請發行總額不超過200億元人民幣，並於未來擇機一期或分期發行。九倉話，擬在獲得批准申請後以中期票據形式發行首期本次債務融資工具，本金金額不超過40億元人仔，票面利率須視乎市場情況及投資者反應而定。首期中期票據所募集的資金，計劃用於為公司內地的項目提供資金或再融資。
由於人民幣匯價偏軟，加上內地利息回落，不少內企已經贖回喺香港發嘅美元債，轉番去內地發債，家連港企都跟住，香港銀行生意又少一瓣，你話係咪惡搞先。不過，咁係咪銀行股買唔過呢？咁就要唔完全係睇生意喎，因為家好多銀行股價錢唔貴，佢哋潛在價值會唔會反映，就要睇有無賣盤機會，有時生意唔易做，反而可能會諗賣盤，畢竟香港銀行資產質素高，管理水平唔錯，對內地大銀行嚟講都仲有吸引力嘅。
陸羽仁
金融High Tea 舊文
來源 source: http://hdfin.stheadline.com