收市閒情：
鏡頭後的公司主席
■有位富二代童心未泯，office成個架都係Winnie the Pooh公仔。 資料圖片
上市公司主席，呢個title就算唔打得，都睇得呀！That"s why唔少大陸佬呢幾年，咁鍾意喺香港買隻殼，然後同鄉親父老叔伯兄弟講，「我是香港上市公司主席！」
上市公司，一聽就知架勢。
但上市公司主席咪又係人一個，好似隻萬亞（8173）大股東楊榮義咁，唔小心買多咗股去到要提全購水平，但佢又唔想做G.O.，相信最後會俾證監會罰。你可能諗，「係咪做緊古惑嘢扮無知？」錯！聽講佢係真心唔小心。上市公司主席喺鏡頭前面好似好型，鏡頭後？我唔直接答你，我用例子答你。
有一個城中超級富二代，雖然唔靚仔，但如果港女睇埋佢副身家，一定覺得佢係吳彥祖級咁正。你見富二代四張幾，行出嚟會超級嚴肅？你試嚇去佢office睇嚇你就明。話說佢office有個大架，放曬佢啲珍藏。你以為佢嘅寶物，唔係古玩就係玉器？咁你就錯喇。
呢位富二代童心未泯，成個架都係Winnie the Pooh公仔。最好笑係有次同事行過見到佢突然除咗條呔，以為有咩事啦，點知佢幫Winnie the Pooh打呔，然後佢竟然滿意地笑。所以話，一個人有錢到盡頭，要笑，其實都係只係對住隻Winnie the Pooh……
啲人話，上市公司老闆上咗岸唔使做。呢個係一個大話！有個上市公司老闆，白手興家之餘，平時見街外人，講嘢好得體又有禮貌。話說呢位老闆到今日公司上曬岸，仍好積極落手落腳做。有一日開會，有同事做嘢唔啱佢心水，開會時佢突然唔出聲。正當大家以為佢發火，佢拎個銀包出嚟，「呢度200蚊。即刻坐的士，拎番個腦返嚟！」
好啦，咁又好多人會話，「上市公司假假地都有名望，對員工唔會太差啦！」又錯！唔少上市公司老細都孤寒到一個點！話說有間公司開party。而party嘅嘢食實在太豐富，包括薯片、汽水，完。所以話，上市公司主席都係普通人。咁上面講嘅係邊間公司邊個人？儍嘅，我當然唔會話你知，自己估。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com