智取大市：清盤都贏錢嘅股
■百盛主席鍾廷森已經73歲，仲有冇心力去將間公司東山再起？ 資料圖片
聯儲局議息後港股先急升後急回，個半鐘跌三百幾點，按情況有聰明錢喺冇壞消息之下突然沽貨，應該要跟機。不過近年都有一個特殊現象，就係間唔時有大戶即市沽錯嘅情況出現，第二日即刻升番曬。要知今次係
沽錯定沽啱，睇埋周五港股表現就知，周五要升，先至證明強勢保持到。最穩陣策略，都係持有藍籌。
百盛（3368）前排公佈以23.2億元人民幣，出售北京百貨店物業連同債權，淨賺9億人仔，消息令股價喺公佈後單日升四成。
兩年前德銀報告講到，剩係計百盛持有物業已值每股3蚊左右（包括已宣佈出售嘅北京物業），今時今日內地資產市場環境，持有物業價值有升冇跌。就當物業值每股3蚊，呢條數已經夠還清所有債務、應付賬有餘，餘下手持現金有成27.55億人仔，即使唔要隻殼，將間公司清盤，每股都起碼贏多3毫子。
股價已由高位唔見幾十蚊，即使一盤生意清盤都可以起碼賺多每股3毫子，對大股東嚟講有乜意思。不過主席丹斯里鍾廷森已經73歲，仲有冇心力去將間公司東山再起？若然佢想法有變，無論點變，對股價都只會有利。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com