高位唔少人沽貨
2016年09月23日
美國議息結束，結果同預期接近，會上維持利率不變，同時表明加息條件增加，市場預期十二月份會加息。消息公佈後，美股高收，港股隨之高開，但跟住就有獲利盤湧出，反映之前兩萬四千點高位嘅阻力。
美股彈完可能要尋底
聯儲局一如預期唔加息，又一如預期
放隻鷹出嚟飛吓，暗示年底會上調利率，從利率期貨睇，O依家市場估計超過一半機會十二月份會加息。美息暫時按兵不動，杜指高收163點，但從過去美股表現，通常股市會喺加息前回落尋底，到加息後再視乎息口走向作出反應。
以年初加息為例，杜指由2015年12月底的17700點樓上插到去15700點，差不多插左2000點，主要係當時估計美國加息會幾頻密。咁即係話美國喺12月加息嘅話，美股有可能喺呢輪反彈後，開始尋底之旅，到年底加息前後，再睇美息前景決定去向。
港股情況比較複雜，因為除左美息外，仲受內地經濟同資金流動影響。如果從今年低位反彈已經有5000點左右，相信向上大幅突破機會唔大。從昨日大市一度上升389點，到收市縮到只有幾十點睇，反映美息已經有左上調嘅時間表，所以趁升市沽貨嘅人都唔少。
一輪升升跌跌，恒指收報23759點，漲89點，國企指數收報9893點，上揚44點，成交867億元。藍籌股較搶鏡係騰訊(700) ，升1.61%，造214.6元；領展(823) 漲2.7%，造56.85元；但港交所(388) 同滙控(005) 都轉升為跌收市。板塊中，煤股借住環渤海動力煤價再創今年新高受捧。南戈壁(1878) 爆升42%，造1.98元，為升幅最大個股；伊泰煤炭(3948) 炒高8.5%，造6.12元；蒙古焦煤(975) 飆7.5%，造0.215元；傳神華(1088) 母公司獲批提高煤炭產量，以壓低近期過高的煤價，神華升4.6%，造15.5元，跑贏一眾藍籌。呢排投資新興市場為主嘅鄧普頓基金(Templeton Asset Management Limited)披露，增持左150.6萬股兗州煤業(1171) ，每股平均4.921元，持股由8.97%增至9.05%。
美國唔加息住，地產股一度搶高，個別創出今年新高，但下午升勢已經縮番。最近二手樓市升番上高點，發展商紛紛趁好價開盤賣樓，各大發展商中，新地(016) 今年賣樓量大，佢已經捷足先登，賣左差唔多四百億元貨，據講幾個賣樓部功臣已經升晒職。要留意係新地股價由低位反彈，早排仲衝左上120元嘅關口，但呢排已經無乜力水再上，昨日新地收118.3元，倒跌左0.4元。由於佢賣樓賣得勁嘅消息已經反映得八八九九，睇嚟佢唔容易大力爆上。
發展商趕年底前賣樓
新地賣樓交到貨，其他發展商仲喺度搶灘。早排賣左一批港人港樓嘅中國海外(688) ，準備推鴨脷洲嘅新盤南區．左岸最快下周開價，下月開售，首批將不少於50伙，定價將參考港島南區及西半山四房單位，並以市價推盤。呢個盤均為4房單位，料以用家為主導。整個項目由2座大廈組成，合共提供114伙，面積由1681至2728方呎，淨係管理費每呎4元，雜費一個月都7、8000元，呢啲豪盤同細單位唔同，真係要考驗吓市場嘅承接力。
美國利息喺今年底會加，來年會點未知。
O依家普遍相信美國經濟經唔起好高嘅利率，但亦有人估央行會趁新總統上台嘅蜜月期，大力啲加吓息，屆時仲遇著樓市落成漸近高峰，對樓價有另一輪考驗，故此未來幾個月，樓市氣氛可以轉得好快，發展商應該有得賣就賣，而佢地嘅股價就好受賣樓成績左右嘞。
陸羽仁
金融High Tea 舊文
來源 source: http://hdfin.stheadline.com