自成一格：歐洲12月真正打大佬！
■倫齊承諾如修憲公投失敗，他將會辭任總理。 資料圖片
英國6月公投結果脫歐搞到世界大亂，前首相卡梅倫如意算盤打唔響仲要自己碌埋落台，將自己命運拎出來賭，真係傻豬到不得了！而傻豬不只卡梅倫一個，周一意大利宣佈將於12月4日舉行修憲公投；總理倫齊（Ma
tteo Renzi）亦將自己命運與今次公投綑綁在一起，承諾如果公投失敗，他將會辭任總理。
今次公投關於乜？總理倫齊提出將參議員人數由315名減至100名，以及限制參議院解散政府的權力等，以圖穩住意大利政局。不過，隨著當地經濟裹足不前，市民對於執政黨的信任每況越下，加上歐洲民粹主義抬頭，當地「五星運動黨」支持度大增，紛紛令倫齊陷於水深火熱中。
一旦公投結果否定改革，倫齊下台再啟動大選，令到「五星運動黨」（M5S）等意大利疑歐派有望上位，進一步啟動脫歐公投，意大利作為歐元區第三大經濟體，脫歐後果不堪設想，分分鐘觸發歐洲金融危機。
此外，其他歐洲地區亦有多個選舉緊隨其後，如奧地利12月初重新進行總統大選；明年法國將選舉新任總統，荷蘭和德國亦將分別進行大選等等，英國脫歐路線亦會明朗化。加上君子不立危牆之下，意大利公投結果絕對影響歐洲人投票意向，有機會「連鎖效應」下齊齊脫，歐盟未來仲會唔會存在，12月真係好關鍵！
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com