財路：理士績靚可望爆上
■理士半年虧轉盈1.1億人民幣；圖為集團主席董李。 資料圖片
光宇（1043）業績靚仔，股價三日幾乎翻咗半番。同類電池瓣數理士國際（842）成績單一樣靚仔，預測PE行內至平，但股價跌足兩周，上周五先大成交一棍向上，有勢再開波。理士公佈半年成績單，虧轉盈1.1億
元（人民幣．下同）。好樂觀計數，半年盈利年率化，理士今年全年預測盈利翻一番到2.2億元，現價1.04元，今年預測5.5倍PE。
上邊光宇，同樣將半年EPS年率化，全年預測EPS0.746港元，而光宇經呢三日翻近半番兼創近年半新高後，今年預測7.6倍PE。
場內同瓣數的天能動力（819）今年預測7.5倍PE、超威動力（951）近11倍。理士就算比起最近磅嘅光宇同天能，今年預測PE，仍然係平咗近40%！
理士引述電池行業研究機構預測，全球對一次性電池同蓄電池嘅需求將以每年7.8%增速。到咗2019年成個市場規模，會上到1,200億美元。除中國之外，印度亦會係需求勁厚地區，估計每年會有雙位數增幅。理士已經喺印度設立合資廠房，按上年年報所講，如無意外應該喺今年4月試產。諗到係，理士食正印度市場起飛，比行家多條財路，嚟緊日子仲爆炸！
呢轉買理士，唔好計多，單係追到去天能、光宇預測7.5倍PE，理士講緊要升37%，到1.42元。
錢雋
細價股專家
本欄逢周二刊出
錢雋
一周三件 - 錢雋 舊文
來源 source: http://hk.apple.nextmedia.com