經濟客艙：
不買iPhone 7的理由
■與其買iPhone 7，不如拎啲閒錢買蘋果公司股票好過。 資料圖片
智能手機市場日益飽和，蘋果公司最大艱鉅任務就係如何突破iPhone銷售。蘋果公司嘅新iPhone今個星期三香港淩晨時間將現真身，呢部機係iPhone面世10
周年前嘅手機，如果要買，寧願再等等。
上星期對手三星Note7電池出事，為iPhone 7造就搶客嘅機會。蘋果公司今次出新機策略玩法已經唔係靠新功能博取用家歡心。用家最關心嘅未必同對上幾部iPhone一樣，睇嚇屏幕幾大、容量幾多或者鏡頭像素有幾勁，因為唔止對手，連普通千幾蚊嘅廉價智能手機都已經追到上述要求。睇到有個調查話，網絡最多人搜尋嘅關鍵詞係「iPhone 7」，第二位係「iPhone 7顏色」。市場已經估計iPhone 7重推黑色外，仲有全新嘅藍色。呢項幾乎同功能無關嘅新亮點，就最多人關心。呢兩隻新色唔同玫瑰金，吸納客戶層面應該更廣。估計蘋果公司開始接受新機預訂，黑色同藍色嘅iPhone 7最搶手，未知會唔會刺激起沉寂咗嘅iPhone炒風。
iPhone 7有新色外，市傳仲有雙鏡頭同A10晶片，但明年係iPhone面世10周年，相信最強嘅賣點都係留番下一代iPhone先出擊。有閒錢不如買蘋果公司股票好過。蘋果公司嘅市盈率只係12倍，相比facebook 60倍市盈率、Netflix 304倍市盈率低好多。另外，庫克年初都講過每年提高派息，仲有大把現金做股份回購。蘋果公司連計股息嘅回報率有2.1%，追到標普500指數年內2%回報。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com