金融High Tea 2016年9月15日
血戰
2016年09月15日
港股繼續調整。不過由於上日無跟美股大反彈，昨日亦唔跟美股大跌。
最近傳賣盤的有線寬頻(1097) 昨日就逆市上升。有傳媒界慨歎，媒體難做，電子傳媒更難做，收費電子傳媒係難做中的最難做，只能係用血肉戰場去形容，所以點解有人會去買有線，只能用非經濟理由猜測。
傳媒界咁講，皆因現時媒體生態大變，本來以為網媒會取代紙媒，點知原來電子傳媒遇到嘅情況仲慘烈，皆因大家都覺得網媒係未來，財團燒錢搶客不手軟。
有中環茶友話，佢乖女喺美國睇Netflix，10元美金有找就任佢點播，咁仲點使睇有線或其他電視。呢個情況一樣殺到嚟，大台畀網劇殺到要大搞機頂盒，但更傷係其他收費電視台，因為網企唔單止搶劇，連內容資源都掟錢狂搶。好似樂視為取得NBA(美國職業籃球聯賽)獨家播映權，為期5年，豪擲金額超過10億元，咁本來做開嘅電訊盈科(008) 下的now TV，又無左隻牌。
樂視進逼 收費電視難做
本地嘅有線電視台，從來都係靠轉播體育節目留客，但近年基本上畀樂視搶晒。本地收費電視台計數，根本無可能俾到樂視筆錢，樂視點解畀到，好多人都唔明，有人話係因為佢喺內地有大盤生意，拉勻香港蝕錢唔緊要；有人話佢可以喺內地搵到風投基金嘅平錢，所以唔怕燒；當然亦有人話佢地唔識計數，遲啲就知味道啦。
無論邊個理由，總之做佢嘅對手，就好似遇著個唔知肉痛嘅狂人，係咪打到成面血，唔知捱到幾時先？所以有線大股東想賣左佢係好合理，關鍵係咪搵到主好人家。早前傳南海控股(680) 有興趣高價競投，南海日前就澄清，集團及公司主要股東于品海並沒有參與競投，只曾與九龍倉(004) 及其他興趣方商討各種合作的可能性。我聽到消息話雙方係傾過，但後來九倉唔係幾想賣畀南海，所以傾唔落去。
由於呢排九倉賣電訊資產消息頻傳，有線股價都跟隨上落，昨日佢升過上最高1.06元，但收市回番0.99元，無上落。
經過美股黑色星期五嚇一嚇，內地A股持續弱勢，上證僅險守3000大關，加上港股通暫停令大市缺乏北水支持，港股繼續反彈乏力，連跌三日，成交縮至9月最奀。恒指收報23190點，微跌25點；國企指數收報9542點，下滑28點，成交609億元。
做百貨最緊要有物業
藍籌股無甚可觀，個股百盛集團(3368) 突然炒起，因售北京百貨店，料錄收益9億元人民幣，全日收造0.92元，大升40%，為升幅最大個股。百盛係最早上市的內地百貨股，曾經威過一段時間，隨著內地市場競爭加劇，利潤按年下跌，最終仲要見紅，由於佢喺消息傳出前市值只係17億元，賣產嘅爆炸力就好大。用番香港百貨公司嘅例子，都係早年做零售賺左第一桶金，跟住置業保住身家，但本業就繼續難做，昨日其他零售及百貨股跟住炒起，好似新世界百貨(825) 跟升6%，造1.1元；歲寶百貨(312) 升2%，造0.51元；華地國際(1700) 升4%，造1.2元；連百麗(1880) 都升3.7%，造5.37元，成為表現最叻藍籌，但係咪隻隻都有產可賣，投資者就要睇真吓先。
陸羽仁
金融High Tea 舊文
來源 source: http://hdfin.stheadline.com