國指破萬關有睇頭
2016年09月09日
港股昨日繼續爬升，資金炒完一輪銀行股，開始搵啲中資股炒吓，同一時間，本地地產股就韌力持續，幾隻龍頭股份繼續衝上今年高位。
股市呢排旺番，聽聞中小企狀況都鬆番少少，生意難做，大家慨歎貧富懸殊加劇，財富集中晒喺財閥身上。中環茶友午間茶局講起，O
依家全球性話題之一，係中產收縮潮，唔同國家都出現財富集中喺少數人手上，美國係金融同科技大鱷，佢地嘅財富比起金融海嘯前同一般人差距明顯擴大，主要係中央銀行印銀紙，令到金融資產膨脹，科企利用市場資金攻城掠地，不斷擴張，好似面書、谷歌、蘋果幾間巨企，創辦人坐擁天文數字嘅財富，加埋原有微軟幾個科企老闆同股神，壟斷左愈來愈多嘅財富。相反，中企喺技術科技化同巨企不斷裁員瘦身下日見收縮。
樓市漲 中產縮
香港無科企，財富在資金湧現下主要向房地產匯聚，結果令地產公司同家族財富遠遠拋離其他行業，O依家做醫生已經係最發，名醫係少數仲買得起豪宅嘅中產，呢樣亦解釋左醫委會死都唔肯改革嘅原因。其他專業無醫生咁限制左供應，又可以飲北水，所以買樓都有難度。咁嘅環境大家都覺得唔健康，但就無辦法打破。
茶友話，以前大家覺得樓價高企難以維持，所以樓價升、地產股價唔升，但呢輪地產股價升先過樓價，唔知係咪代表大家無奈接受左現實嘞。
唔理茶友咁高層次嘅解釋啱唔啱聽，總之地產股昨日繼續有料到。新鴻基地產(016) 昨日公佈截至6月底止全年業績，純利326.66億元，按年增加5.1%，每股基本盈利11.31元，末期息2.8元。股價喺公佈前就湧左上去120.8元，升左2.3%。佢呢排股價升得幾急吓，睇業績好消息公佈後有可能會回吐吓。
除左新地，幾隻地產股都創出今年高價，包括會德豐(020) 、新世界(017) 同嘉里(683) 。會德豐同嘉里係今年賣樓較多的公司，本來都幾頭痛點樣去貨，點知樓市借住脫歐點着左，跟住仲嚟多劑兩個環保人士打入立法會，咁就送佢一程順風車。新世界就資產折讓大，今年淨係食私有化左新世界中國，撞正內地樓市急升，應該都幾和味。
呢排美股其實大牛皮，港股咁升好多人話同資金流入有關。瑞銀資產管理董事總經理施斌都話，近月歐美投資者對中國資產關注度明顯上升，相信與歐洲及日本推行負利率令資金流向新興經濟體尋求較好回報有關，預期此趨勢將持續一段長時間。由於目前A股估值開始偏高，內地資金近期也在加倉估值較低的H股，料本港市場短期表現不錯。外資睇番好啲，加上內地8月進出口數據醒，加上憧憬歐洲央行加大放水，港股昨日調整後，恒指先低後高，創今年新高。恒指收報23919點，漲177點；值得一提係國企指數重上10000關，收報10008點，上揚38點，成交金額773億元。如果中國數據好轉，外資對內地睇法真係改善，咁中資股可能仲有力追落後。
濠賭股炒五年規劃
昨日有兩個板塊升得唔錯，澳門特區行政長官崔世安公佈首份五年發展規劃，濠賭股全線急升，金沙(1928) 漲4.4%，造34.5元；銀河娛樂(027) 揚5.85%，造28.95元，金沙與銀娛包辦藍籌升幅榜首兩位；美高梅中國(2282) 升3.21%，造12.88元；新濠(200) 漲4.34%，造10.1元；澳博(880) 漲2.86%，造5.4元；永利澳門(1128) 升4.5%，造12.54元。
蘋果公司正式發佈新智能手機iPhone 7和iPhone 7Plus，相關概念股大致造好，瑞聲(2018) 創上市新高，一度高見90.65元，收造90.2元，漲3.3%；其他手機零件股舜宇(2382) 報40.6元，升2.27%；比亞迪電子(285) 飆5.2%，造6.67元。
另外，正籌劃資產重組重大事項的洛陽玻璃(1108) ，股價爆升39%，收6.6元，為升幅最大個股。
陸羽仁
金融High Tea 舊文
來源 source: http://hdfin.stheadline.com