女神tea time：
新iPhone、新能源股攻略齊發
■如果閣下冇心癮想換機，就不如等多一年，因為出年係iPhone面世10周年。 美聯社
蘋果iPhone7同iPhone7 Plus正式公佈，一如預期，今次新機冇咩值得預期。至於粒勁似「逗號」嘅耳機，只要唔小心唔見
咗一邊，就可以為部耳機寫上句號。不過又咁，或者呢個就係庫克條橋，「你唔見咗一粒咩？買過一對啦！」係咪突然睇到蘋果條財路呢？
即係咁，如果家陣用緊部機仲完好，又冇心癮想換機，就不如等多一年。話曬出年係iPhone面世10周年，所以相信蘋果應該將所有絕技，放曬喺下年部機度。同埋，或者你唔係好介意，但下年嗰部iPhone，你買咗嘅，就叫買咗「8」返屋企，而唔係買咗「7」。至於炒唔炒機呢，要炒就炒鋼琴黑128或256GB大機，最安全。
講返股份推介，是日睇好隻協鑫新能源（451）。首先，近來新能源股有氣勢，中電新能源（735）、天津創業環保（1065）近來都起跳。其次係，協鑫新能源基本面來講冇得輸，上月底公佈上半年業績，純利大升1.3倍至1.67億人仔，比起8月中公佈盈喜預計嘅超過1.3億人仔仲要多。
至於今年餘下月份，值得期待嘅炒作主題係深港通。今次深港通嘅港股通名單，只要係恒生綜合小型股指數成份股，同時市值有50億元以上就入圍。協鑫新能源最新市值超過80億元，相信要中選冇咩難度。咁話說佢阿媽保利協鑫（3800）一向內地知名度高，所以協鑫新能源有機子憑母貴。
協鑫新能源昨日股價一突破12月嘅供股價0.45元，就一箭飆上去。不過如果大家睇耐少少，呢隻股被保利協鑫收購後，市值曾升到超過200億元，所以現時先得80億元多啲，現價安全；昨日股價先開始突破，加上仲要係毫子股，所以應該未炒完。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com