金手指：黑天鵝如何變假
■筆者要講黑天鵝，係因為今日德銀睇落好似雷曼末期嘅走勢。 資料圖片
昨日拜讀曾淵滄博士題為〈市場充斥假黑天鵝〉嘅文，我完全同意。最同意嘅，就係博士話：「黑天鵝一詞已被財經界人士濫用了。」黑天鵝一詞，來自我最喜愛嘅哲學家Taleb，佢話係一項你事前完全唔知會發生
，不過事後回望又好似大把先兆嘅大件事。咁其實，財經界人士濫用此詞，最主要原因，係當一件大事發生時，好多財經界人士睇唔到會發生。如Taleb自己成日話，對於一個喺農場長大嘅火雞，日日都冇事，不過感恩節一到被劏，就係黑天鵝事件，不過對個農夫來講，就唔係黑天鵝。
2008年金融海嘯都係一樣。個個（根據大行、學者、官員等）都話係黑天鵝，不過當年孫柏文啲fan屎就唔會係。而今日要講黑天鵝，係因今日德意志銀行睇落好似雷曼末期嘅走勢。
罰款，只係星星之火。佢由2008年至今，一路都冇解決過疑似資不抵債嘅狀況，先係火藥。當然，經過2008年後，大家都識睇大行大鑊之兆。只不過過去八年，我哋已計埋一旦有事，央行、政府們會聯手救。今日黑天鵝個位，就係當政府、央行都疑似冇招剩，當有咁嘅銀行出事時，點救呢？
當呢種逢出事都被建制救（即印銀紙），開始被全世界人民唾棄，由英脫歐、特朗普、AfD、五星黨、十年考六次會考先pass嘅人成建國後票王等，終極重寫世界秩序嘅黑天鵝亦快起飛了。中行（3988）、工行（1398）都係德銀嘅大交易對手，德火燒燶中，咁就真係黑天鵝。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com