魚樂無窮：誰是大選真贏家
■香港股民已經好似周星馳喺《回魂夜》裏面一樣咁膽大。 劇照
「知否世事常變，變幻原是永恒！」唔知籮記當年唱呢首歌時，估唔估到今年咁多變。特朗普入主白宮，重演英國脫歐變天劇本。不過，這是真的黑天鵝嗎？學欄友高明話齋，公投票有得揀脫歐不脫歐，同樣大選票亦有得揀
特朗普與希拉莉，所以極其量只能說是爆冷（根據民調），甚麼是黑天鵝？樓價只跌不升、梁振英撐港獨、劉德華做特首……
「朝頭早玩海盜船，晏晝先玩過山車，黃昏再玩多次海盜船！」周星馳喺《回魂夜》咁樣解釋畀莫文蔚知，自己點解咁大膽。其實香港股民膽子亦越來越大︰年初有A股熔斷，跟住輪到脫歐，𠵱家又有特朗普，真係冇乜風浪未見過。
亦因如此，短炒功力亦越來越強，噚日恒指最多跌唔夠千點，收市跌幅減半，執筆之時夜期仲升緊100點，比起脫歐時彈得更快更狠，心理質素差啲或者膽量唔夠，已經冇份坐順風車。
冇人估到特朗普下一步棋會點行，令不明朗因素增加，後市易跌難升，橫行局面有望打破，尋常股民早就已經蟹貨纏身，惟有有錢人有無限彈藥掃貨，最終又會上演一場財富轉移遊戲，講到呢度，大孖沙們已經開緊香檳慶祝了。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com