食唔切天鵝肉
2016年11月10日
登！登！登！特朗普來了！美國大選爆出「黑天鵝」，事前被華爾街講到當選個天會冧落嚟嘅共和黨候選人特朗普，勝出大選，美國杜指期貨喺外圍跌到停板，不過，港股喺大插過900點後，中午驚魂甫定，跌幅慢慢收窄，最後跌494點收場。
特朗普當選為投資市場帶來不明朗，金升股跌，但市場情緒
似乎好快恢復冷靜，金價喺飆升一輪後回穩番。由於特朗普當選，美國下個月係咪加息變成無咁肯定，估計呢個亦係減低市場震盪嘅原因，情形一如英國脫歐，市場因驚恐變成觀望央行會唔會放水一樣。
央行失效 選民逆反
喺美國大選前，中環茶友已經再三質疑特朗普勝出係無法預見嘅「黑天鵝」事件，認為特朗普呢位串嘴大亨能夠喺媒體唱淡下接連過關斬將，反映建制愈唔鍾意佢，選民愈係要選佢嘅逆反心態。
呢次特朗普勝出，可以形容係選民向制度說不的結果。過去兩屆總統任期，民主黨嘅奧巴馬其實做得唔錯，佢卸任前民望仍然唔差，但選民覺得希拉莉係傳統精英的典型，年紀大，誠信又有問題，既得利益集團夾硬支持佢出嚟選，等同質個爛蘋果要選民啃，最後決定寧願揀個口出狂言、猛爆桃色負面新聞嘅地產佬，可見選民逆反心理有幾強！
茶友喺選前預告，話若然特朗普當選令股市大跌，佢就會入市博食天鵝肉，可惜昨日佢無咁嘅機會，因為指數上午喺特朗普未勝出時跌左九百幾點，但佢話脫歐黑天鵝都跌過千點啦，美國總統選舉爆冷，點都有番過千點跌幅啦，殊不知午後個市已經反彈，佢覺得500點唔夠肉食，怕彈完再回，所以就觀望吓先。茶友話，如果入市，佢會諗吓買啲科網股或者商廈收租戶。
茶友嘅一番分析，其實都反映高級中產者的心聲。最近幾年各國中央銀行係咁印銀紙大搞量寬，結果大財團、巨企身家不斷暴漲，但實體經濟無受惠，中產生活無好轉，我叫呢啲做「央行失效」，喺咁環境下，華爾街大行同經濟學者就算恐嚇話特朗普當選，股市會大跌，中產都會覺得咁關我乜事？於是大家繼續投票表態對制度不信任，有人形容呢啲態度有少少左傾，有人話係民粹，客觀啲嘅講法係對貧富差距拉闊同中產下流的不滿。特朗普喺競選時曾講過唔贊成量化寬鬆，呢個說法華爾街唔啱聽，但就成功針對中小企同中產對實體經濟惡化嘅不滿。
特朗普做左總統，對現實不滿嘅選民出左一口烏氣，但咁樣係咪解決左問題，我覺得唔可以樂觀，因為成個制度就好似一個醬缸，任何人跌左落去，都唔容易掙扎番出嚟，特朗普係咪超人，可以喺官僚同政客包圍下做到幾多嘢，現階段真係唔可以有乜期望。
金礦股成跌市贏家
大市昨日跟住大選選情好似過車，恒指承接美股周二升勢，高開138點，隨著特朗普於點票結果領先，港股即被消息震散，午後特朗普取得大部份搖擺州份選票，恒指跌幅進一步擴大，曾挫952點，低見21957點，惟22000關有承接力，之後港股跌勢收窄，恒指收報22415點，下挫494點；國企指數收報9378點，瀉281點，全日成交1042億元。
藍籌股普遍下跌，滙控(005) 大跌1.9%，報58元；友邦(1299) 走低2.2%，報47.45元；中石油(857) 大插3.7%，報5.2元。避險情緒下，金價重上1300美元，黃金股逆市造好，招金(1818) 大漲8%，報8.74元；紫金礦業(2899) 5%，報2.74元；中金國際(2099) 升5.6%，報20.85元。
輸家股份就有出口股，創科(669) 跌3.5%，報28.9元；敏華(1999) 、利豐(494) 跌4.5%，報3.64元。本地地產股隨大市再跌，新地(016) 跌1.3%；長實地產(1113) 跌3.2%；其實若可能加唔到息，對地產股有利，怕只怕過兩個星期聯儲局覺得無乜嘢，照樣加息啫。
陸羽仁
金融High Tea 舊文
來源 source: http://hdfin.stheadline.com