財路：資策食正樓市狂熱
■香港樓市發熱，資策有條件再起飛；圖為集團主席鍾楚義。 資料圖片
資本策略（497）發咗半年盈警，但報載集團今年以嚟，中港兩地物業銷情keep住靚仔，加埋本地薑地產股有勢再爆，睇位收集資策。
資策今年上半年盈警，主因欠奉好似上年出售上海新茂大廈錄到巨利。但咁睇，資
策今年頭五個月喺中、港兩地售樓，合共套現15億元。資策盈警報告亦講明，集團50%合營別墅項目「英庭名墅」銷情理想，預期大部份銷售喺下半年入賬。查實資策房住瓣數銷情靚仔，只係等入賬反映，今年度全年成績單，應該有睇頭。
資策家陣NAV0.96元，現價0.28元得0.29倍PB，呢個NAV，仲係未計集團揸住同有份參與，包括九龍灣、中環閣麟街、灣仔道等地區土儲。而喺上一期財政年度，資策亦投到毗鄰粉嶺高爾夫球場住宅用地，同山頂道一個現有住宅項目，呢批地段全部寸金尺土。唔計增值前，資策過去未年平均0.45倍PB，家陣PB，比呢十年平均平咗36%，資策殘到不堪。
呢期英皇（163）升57%，嘉華（173）仲勁，累升咗71%。資策又點？同樣以今年低位0.201元計，到家陣累升39%，資策升得最少。再講，香港樓市發熱，本地地產股有point再起飛。資策近四個月橫行底0.265元，資策再跌，冷灶煲一煲，當上番十年平均0.45倍PB，都講緊要見0.43元，即係資策現價要升54%，建議入市價升62%。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com