金手指：建制派樣辦在冰島
■冰島一個傳統大黨於大選贏最多議席，建制派得以留存。 資料圖片
今日，首先要同大家預告下周寫啲乜。下周，將會講花旗國總統選舉結果公報日嘅炒股攻略。要講嘅原因，係因上次英國脫歐公投，喺6月21日孫柏文寫嗰篇題為《公投後的大奇蹟日》嘅文，俾嘅攻略，我嗰位十億老炒
家朋友，就係跟足去做，之後笑騎騎打來話：「一日賺一年嘅錢！今年可以收工！」所以，我要再來多次。
咁脫歐嗰次，我話明因市場覺得唔脫，所以要炒，係要脫贏先有波幅去炒。今次，則一樣，要特朗普贏先有。
不過，全球反建制浪好似喺花旗國選前呢刻，走勢被挫。由英國脫歐到香港立法會「梁劉遊朱」，建制秩序不斷被打爆，不過啱啱喺冰島嘅大選，顛覆派嘅「海盜黨」，喺選前被睇好後，居然遜預期咁同另一個黨平頭第二。世界各地嘅建制既得利益者鬆一口氣，因覺呢個顛覆浪似見洪峯，起碼冰島嗰啲建制好似冇殲滅。
如果你都係咁諗，你就錯曬。冰島雖然隊咗個總理落來，不過確實其中一個傳統大黨贏最多議席，建制得以留存。原因唔係顛覆浪見洪峯，而係全球咁多個地方，喺2008金融海嘯後，唯一一個建制做得啱嘅地方，就係冰島（連香港都戇99咁「保證所有存款」為下個金融危機埋炸彈）。
冰島做咗啲乜？首先，佢哋雖2008年前，係其中玩信貸泡沫玩得最狼嘅地方，不過爆煲後，先冇救銀行、有得啲錢人輸清等等，跟住仲有例如啲銀行佬坐監、國會大換血，最後就係冇採納國際專家提供嘅「逆周期」建議。Work，令國民心服，保建制。
其他地方？哈。特朗普真係有機贏，下周真係有得大炒，大家留意本欄啦！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com