智取大市：
迎通脹穩健之選
■高鑫零售股價波幅唔算大，更易坐得穩。圖為集團首席執行官Bruno Mercier。 資料圖片
11月底前恒指弱弱下跌，最強嘅商品股、賭股都破位起飛，若驚大市跌唔買貨，恐怕會錯失埋航運股嘅機會，尤其喺基金11月年結前後，應該早買早享受。
大家已經趕緊迎接
通脹時代，發酵過程比想像中快，除咗上述選擇之外，食品、超市股有可能係下一股勢力。
食品、超市股裏面，經營大賣場嘅高鑫零售（6808）盤數最靚。公司公佈9個月業績，純利按年升1%，至20.31億元人民幣，每股盈利0.21元人民幣，年度化市盈率約20倍。聯華超市（980）已經有行業強者永輝入股，業績都係死嚇死嚇，估值超殘嘅物美就已經私有化，變咗高鑫零售係少數理想選擇，優勢壓一。
高鑫喺之前逆境之下，已經交出穩健業績，通脹升溫之下，相信明年增長幅度會擴大，市場遲早預期通脹概念股明年好過今年，高鑫就有上升空間。相對商品股、航運股，呢隻波幅唔算大，更易坐得穩。
順帶一提，之前推介I.T（999），近期積極回購股份，3蚊樓下公司拎真金白銀出嚟撈貨，睇嚟係睇好明年表現，加上旗下izzue提早退租銅鑼灣巨舖，縮減香港業務絕對啱曬原先劇本，嚟緊股價升勢可望持續。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com