中環在線 - 李華華 2016年11月3日
中環在線：翠華總廚變身非執董
■李祉鍵
翠華（1314）經過幾個月賣盤與股東內訌風波後，大股東兼主席李遠康終於出手執過個董事局。佢31歲兒子李祉鍵被委任為執行董事，而喺翠華工作13年、曾擔任總廚嘅鄭如生就升呢為非執行董事，年薪過百萬元，誰說廚房佬冇錢途？
三股東已被out 太子爺入局
翠華有5位主要股東，李遠康佔大股，其餘4人包括張汝彪、張汝桃、張偉強同何庭枝，5人持有翠華約55%股權。翠華今年8月舉行股東會，張汝彪與何庭枝被踢出董事局，翠華日前宣佈委任李祉鍵做執董，佢英國大學畢業後，加入翠華超過6年，負責品牌發展。太子爺升做董事後，月薪7萬元，年尾仲有花紅。
太子爺入董事局幫阿爸手，並唔出奇，今次調動，最特別係51歲總廚鄭如生都升呢為董事。鄭如生喺沙士嗰年加入翠華，係中環威靈頓街分店負責人，2006年擔任總廚，兩年後有份籌備上海分店，至今一直睇住集團香港飲食服務。按佢嘅工作範疇，照計應該做執行董事，唔知點解公司只安排佢做非執董，呢位非執董都幾多實務工作要做。
說到底，職銜只係表面東西，執行與非執行，佢都係董事，最緊要獲老細信任兼有權，更重要係有錢落袋，鄭如生做董事之後，袍金加底薪，月薪合共8.5萬元，一年就有102萬元，呢位總廚都算捱出頭來。今次調動後，翠華5位股東只有李遠康與張汝桃在董事局。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com