天鵝黑定白 大戶話晒事
2016年11月03日
政治同經濟一向關係密切，昨日股民就講政治興趣大過講經濟。美國總統選舉忽然又話大嘴巴特朗普仲未輸得晒，搞到美國插番過百點，最新民調佢仲領先希拉莉一個百分點，有少少得人驚，港股即時低開。
中環茶友唔停口講政治，話香港就出現兩個新議員好大
機會被人大釋法踢走，而傳話商界支持落場參選特首嘅財政司司長曾俊華收到阿爺discourage(不鼓勵)佢，講講吓仲講到美國選舉隨時出現股市黑天鵝。
金礦股借勢彈上
美國大選轉入直路，特朗普在早一階段俾人放桃色醜聞錄音狙擊下，形勢江河日下，連佢自己都似乎打定輸數，點知突然FBI話重啟希拉莉嘅電郵門調查，令人覺得呢次爆大鑊，可能係特朗普支持者送左猛料畀FBI，去到呢個位，邊個敢話特朗普一定唔得？
大選前忽然搞出執法部門介入，令特朗普隨時鹹魚翻生，有370名經濟學家，當中包括8名諾貝爾經濟學獎得主就跳出來，喺《華爾街日報》發表聯署信，呼籲民眾在美國總統選舉中，不要投票給特朗普。他們信中列出13項經濟論點，認為特朗普的主張出錯，例如反駁特朗普否定北美自由貿易協定，向中國產品增加關稅等。
有包拗頸嘅中環茶友笑言，O依家支持特朗普嘅人本來就係好唔like華爾街同經濟學家呢啲精英，佢好懷疑個聲明嘅效果係discourage左特朗普班支持者，抑或係幫倒忙，等如幫佢拉票，令後生仔覺得「精英話唔好我偏要投」。
茶友再唱反調，好多人話特朗普上台係黑天鵝，係佢就準備食黑天鵝肉啦。好多人話特朗普癲，佢覺得呢條友做左總統就唔係咁癲，最緊要係就算佢咁癲，你估一條友入左去白宮就做到嘢咩？如果特朗普選到，都係好似當年董伯伯做特首，畀佢旁邊嘅人阻住郁唔到，所以佢就算選到，唔通個市會股災咩？呢啲其實都係大鱷喺度上下其手啫。
茶友意見咁高，真係信不信由你，但市場係大戶話事，大戶話隻天鵝係黑就黑，係白就白，佢地O依家話特朗普選到係壞消息，咁個市咪要跌吓先囉。市場永遠係有錢嘅人話事，投資者無必要拗頸。我搭嘴話咁萬一特朗普當選股市大插，反而可以入去撈吓貨。
人仔影響更重要
資金都有啲避險情緒，最明顯係金價又升，呢樣亦印證左我講，黃金價在國債債息大升後無大跌，好易借啲意又炒上嘅分析。金價炒特朗普當選湧上一個月高位，撲近1300美元，帶挈金礦股逆市跑贏。中國黃金(2099) 揚5.8%，造20.7元；招金(1818) 仲犀利，彈升7.4%，造8.45元；紫金(2899) 抽升5.7%，金舖股亦受追捧，周大福(1929) 升4.6%，造5.89元；六福(590) 升0.43%，造23.4元。
金礦股成為避險得益者，其他股份就無乜運行。恒指開市已失守兩萬三大關，其後沽壓加大，午後最多跌362點，低見22785點，恒指收報22810點，下挫336點；國企指數收報9519點，下滑186點，成交金額546.5億元。
滙控(005) 、建行(939) 、騰訊(700) 合力砌底恒指104點。滙控跌1.28%，造57.7元；建行挫2.42%，造5.64元，為包尾恒指成份股；騰訊降1.35%，造204.4元。
港股腳軟，與其話係特朗普效應，不如話係內地限制資金南下影響未散，人仔雖然呢兩日穩左啲，但相信阿爺仲係會睇緊啲外匯，咁港股就好難有大彈嘅條件。
陸羽仁
金融High Tea 舊文
來源 source: http://hdfin.stheadline.com