中環在線：
霧霾擋路 馬雲叔叔慢速送貨
■有內地網民發起一人一相反霧霾，但抗議相好快被消失。
最近北京又再被十面「霾」伏，內地多個城市同受嚴重霧霾影響。順豐、圓通等速遞公司日前發公告，話天氣問題令運輸服務受阻，多個地區嘅快件都變慢件，最少延遲一至兩日先收到咁話。
上周五，北京發出
今年首個霧霾紅色預警，當地航空服務更加亂曬龍。相信一心諗住少出外、留喺家中淘寶嘅市民一定「藍瘦香菇（難受想哭）」，因為各地交通服務受阻，連速遞公司話送快件都要延遲。
順豐及圓通日前指，北京、天津及河北省等多個地區，因實施單雙號限行兼封閉高速公路等等，快件服務預料會受阻。據內地菜鳥網估計，最少涉及4,000至5,000個包裹。
講番轉頭，內地話要推動綠色能源政策，講就講咗好耐，不過始終解決唔到空氣汙染問題。好似2014年嘅亞太經濟合作會議（APEC）咁，為咗讓外賓留下美好印象，工廠停工、車輛限行，咁先製造到「APEC Blue」咋，不過會議結束後隨即打回原形。
內地霧霾問題已變成公開嘅秘密，但政府唔畀人講就唔代表問題唔存在，早排就有內地市民發起反霧霾行動，亦有人戴口罩走上街頭，抗議政府治霾不力，唔通又要搞到「解決不到問題，就解決提出問題的人」？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com