操盤手劄記：
深港通車吉利踩油
■吉利是滬港通、深港通上榜股份，易吸引大媽投資。 資料圖片
扭開電視，播緊南韓綜藝節目《Running Man》，以前覺得搞笑過癮，𠵱家就笑唔出。呢個節目嘅招牌遊戲係「搣名牌」，估唔到現實生活中，特首都追住班非建制議員嚟搣名牌！《RM》裏面最強能力
者係金鐘國……鐘國，一聽就知，強！
中國總理李克強日前披露，內地經濟今年已達標！睇嚟央行今年餘下時間嘅政策取向，應會繼續收緊短期流動性以去槓桿、抑泡沫。近期央行通過公開市場操作「縮短放長」，變相加息，收水之舉已令中港股市升極有限。
港股奄悶，恒指連續12日喺22450至23000間橫行，波幅指數更跌至14.4，反映市場預期後市波幅收窄。恒指昨收22800點，升125點或0.55%，主板成交625億元，本周連續三日都係600億元水平。深港通開通三日，市場反應比兩年前滬港通開通時更差，買賣兩閒，相關概念股如港交所（388）、券商股更趁機散水。不過首次納入港股通投資範圍嘅小型股，就個別見有炒作。深港通未係時候收割，皆因資金未到、時晨未到，現時正係部署時機。
睇深市港股通成交榜，比亞迪（1211）連續三日位列三甲，H股平過A股兩成半，自然吸引大媽！該股三日以來，分別錄得1.3億元、逾2,500萬元、近1,900萬元淨流入，惟周一失守250天線（約45元）支持位，昨收44.3元，後市偏弱。
汽車股中，吉利（175）、東風（489）、華晨（1114）、長汽（2333）都係滬深港通上榜股份，更易吸引大媽。汽車股呢兩日陸續公佈11月銷售數據，吉利、東風、長汽11月總銷量分別按年增長99%、14%、43%；首11個月總銷量分別按年增長44%、11%、22%。
吉利銷情最勁，股價昨午轉強，收8.3元，升4.27%，成交激增四成至8.6億元，打入十大成交榜。睇走勢圖，正挑戰前高位8.38元，若突破可挑戰另一高位9.2元。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com