財金冒險號：
買鎊沽歐元更值博
■歐洲明年問題多，相反英國經濟未必太衰，投資宜買英鎊沽歐元。 資料圖片
下星期美國幾乎肯定加息，今晚歐洲央行卻可能宣佈延長QE。一個收水一個放水，歐元兌美元隨時再貶，但畢竟美元已急升，買英鎊、沽歐元或更具值博率。
歐洲明年問題多多，2月意大利可能選
總理，3月底前英國啟動脫歐，5月法國大選，10月德國大選。特朗普跑出，標誌全球政治轉右。意大利會否選出主張脫歐嘅「五星運動」，難料。法國新總統已非左定右嘅問題，而係右派與極右之爭。德國總理默克爾夫人去年9月豪言「接收難民無上限」，搞出個大頭佛，終於承諾收緊移民政策，但悔之已晚，根據德國最新民調，逾六成市民反對佢明年連任。歐元區三大國，是但一個搞脫歐都唔得掂。
就算維持到歐元區完整，債務危機陰魂不散，希臘剛剛促請歐盟寬減債務，意大利壞賬纏身嘅銀行亦需救助。反而今年英鎊大跌，兌歐元都跌咗13%，對英國出口、旅遊、地產都有幫助，經濟唔衰得去邊，通縮風險亦遠低於歐元區。歐盟對英國脫歐嘅立場亦已軟化，可能容許「軟脫歐」，仿效「挪威模式」，咁對英國經濟嘅打擊就細得多。
估計明年美元見頂，英鎊則可能已率先見底。趁港元強，係時候撈英國資產。如果買樓係「綁住你的青春」，寧願綁住你嘅，係估計賣150萬嘅屯門128呎劏房，定係曼徹斯特兩房單位？
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com