滙控股價睇住美國走
2016年12月08日
世界輪流轉，差唔多無威成十年的滙豐控股(005) 呢排轉左運，喺大摩護航下再創今年新高。
世間沒有無端端的愛，也沒有無端端的恨。大摩今次唱好滙控，反映大行對銀行股睇法有改變。大行O依家唱好嘅論據，其實都係話佢用真金白銀回購，同埋美國加
息會令銀行股息差擴闊。滙控回購唔係今日嘅事，佢開始出手時大行無乜邊個好重視，O依家佢回購嘅子彈其實已經用得七七八八，但大行就估佢未來會加碼，有啲仲估佢可以有成百億資本用嚟回購。
高盛爆炒已喪升
大行唱好滙控的原因，呢啲錦上添花嘅言論聽吓無妨，有時唔可以當真，因為曾幾何時，今日有份唱好嘅大行，曾經做大淡友，話最壞情況睇28元，當時正值英國脫歐，大家前路茫茫，真係心血少啲都畀佢嚇到低位沽貨。當時我已經話呢啲大行所謂最壞情況，講到天崩地裂，一味喺處嚇人，究竟發生機會有幾大先？呢啲時間就算唔敢低吸都應該死坐收息頂住先。O依家睇番轉頭，大行呢啲報告真係識就畀佢笑死，唔識就畀佢嚇死。
講到銀行股，陸羽仁都係信銀行家分析多過大行。有銀行家話，特朗普上台，對銀行有兩個好處，一個係佢贊成再通脹，擲錢搞基建，如果經濟熱啲，利率上番正常啲，對銀行息差應有幫助；二係放鬆銀行嘅監管，咁會令銀行成本減低，兼且易做生意啲，所以消息公佈後，美國銀行股升得好緊要，特別係有前要員撐特朗普嘅高盛，過去一個月股價由181美元炒上左231美元，升左超過三成。美國銀行股升成咁，滙控嘅上升，又點止係回購咁簡單？
銀行家話，所以如果要分析滙控走勢，與其聽大行講，不如睇住美國銀行股同埋特朗普上任後點樣操作佢嘅財政政策。
半新股變炒家樂園
雖然銀行股經營環境有改善，不過亦唔係全無憂慮。國基會就警告美息若然向上，會令樓價下跌，令金融體系受壓。美銀美林發表亦研究報告指，香港政府上月推出樓市「加辣」措施，將第二個住宅單位從價印花稅劃一增至15%後，預期本港地產股未來六個月將跑輸恒指，短期成交量將跌30%至40%，樓價亦跌5%。
銀行家話，若然樓價微調當然無壞，但如果樓價跌得多，對銀行資產質素就有影響，所以影響銀行股表現一個好重要因素，就係美國加息步伐同幅度係點。中線嚟講，美國溫和加息對銀行股係好事，若加息幅度急又快，咁就壞事變好事，月中聯儲局加息係預期做法，但佢點講息口前景就好重要，如果到時銀行股炒得高，就要防止佢回吐嘞。
呢兩日唔止滙控向好，其他銀行股表現都唔錯。大笨象昨日再升3.3%報65.5元，再創一年新高，敲響左聖誕鐘；中銀香港(2388) 升1.9%報29.5元，另外國壽(2628) 升0.9%報22.5元；平保(2318) 升1.21%報41.9元。
大市於滙控拉動下，收報22800點，升125點；國企指數收報9829點，漲60點，成交金額625.07億元。
其他板塊方面，金屬股再現炒風，鞍鋼(347) 漲10%報4.9元；馬鋼(323) 走高7%報2.19元；中信大錳(1091) 走高11%報0.61元。此外，半新股續為炒家樂園，膳源(1632) 升17.5%報17.08元；金匯教育(8160) 飆升41%報收0.365元；盟科(1629) 爆升53%報1.39元。繼續一個搵嘢炒的格局。
陸羽仁
金融High Tea 舊文
來源 source: http://hdfin.stheadline.com