智取大市：商品以外的選擇
■嘉華主席呂志和。 資料圖片
港股順利突破二萬三，成交700億元未夠，應該未見頂，揸到過埋年，問題不大。個別商品股同傳統藍籌升得勁，二三線股仲未爆上，有機會接力。
睇圖即將起動，有霧霾概念股信義光能（968），開始逐步轉強，若然破埋阻力2.8元應該升勢加速。
炒完上遊商品，下遊通脹概念如百麗（1880）亦沿住保歷加通道中軸支持慢慢向上，等幾個交易日應該有唔錯表現。
人棄我取未必唔得，美國議息前，本地地產股反而有機會升一轉，理由同去年尾小弟預測港股1月升浪相若，倘若2月初美國再加息，今年餘下時間加息壓力就變相減細，2月初唔加息，自然不是壞消息，喺加息消息已消化之下，無論點都對本地地產股冇壞影響，港股又呈強勢，睇圖本地地產股普遍沿住保歷加通道中軸緩緩向上，只待升勢加速，而美國議息前後就係升市時機。
藍籌地產股嫌冇肉食的話，二三線嘉華國際（173）比起其他地產股還要強，原因三個字「有樓賣」。嘉華已獲批售樓紙嘅項目啟德嘉匯，提供約900夥，定價參考啟德1號2期，預計好難賣得差，集團預期今年賣樓銷售額目標90億元，有望挑戰新高，博地產股，自然先諗呢隻。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com