金融High Tea 2017年1月27日
辛苦起樓不如賣地
2017年01月27日
美股創下歷史新高，杜指收市衝破兩萬點大關。港股真係過年前先派利是。
杜指於周三歷史性突破20000關，港股周四隨外圍股市造好，午後更一度升337點，高見23386點，收報23374點，升325點；國企指數收報9854點，漲112點，成交金額650億元。
滙控挑戰一年高位
市場憧憬可受惠於特朗普放寬金融規管，滙控(005) 大升1.83%，報66.7元，準備挑戰一年高位。渣打(2888) 亦升至77.45元，走高2.7%；市傳人行要求內銀嚴控今年第一季新增貸款，內銀股股價卻造好，工行(1398) 升1.7%，報4.8元。另外旺旺(151) 升3.8%，報5.41元，成表現最佳藍籌。
工信部官員日前表示，要抓好有色金屬去產能工作。有色金屬股周四續獲資金追捧，俄鋁(486) 再爆升9%，報4.68元；中國宏橋(1378) 升8.5%，反而隻中國鋁業(2600) 無乜表現，只升0.3%。
有利是收嘅唔單止係股民，仲有政府庫房。以天價投地技驚四座嘅內地民企海航集團再出擊，透過旗下香港國際建投(687) 以近55.3億元，擊敗17組財團奪得啟德住宅用地。該地地盤面積約78771方呎，最高樓面面積為425361方呎，以成交價計算，即每方呎樓面地價13000元。呢個項目佔地約逾7.87萬方呎，總樓面逾42.53萬方呎，為該發展區推出的第10幅住宅用地，市場估計樓面呎價9000至12000元，地價總估值38.3億至51億元，結果連預期上限價都穿埋。
海航天價奪地，對地產股無乜推動力，高價投地嘅香港國際建投收市報4.83元，升左1.5%。海航系近年在港不斷併購，今次香港國建用左咁多錢投地，大家就估佢會唔會伸手。隻股去年10月大炒過上8.48元，之後散左，現價得番4.83元，大上大落好難炒，如今市值得55億，市值同佢投幅地一樣咁多，細股天價投大地，真係唔知後向點。
啟德地賣天價推唔郁地產股
中環茶友話，中資天價投啟德地，附近有地嘅嘉華國際(173) 計落好超值，應該成為大贏家，無奈昨日股價竟然跑輸大市兼對手，只係升左0.5%，收報3.84元。
嘉華年前喺啟德投左塊地，今年應該賣得樓，啟德早前開嘅盤市場反應唔錯。就算只係用海航嘅投地價13000元一呎，唔加建築成本計算嚟訂價，佢都已相當和味。集團除左有物業外，仲有大手銀河股份用作長線投資，呢排濠賭股當炒，地價又升，嘉華都係表現追唔上。目前佢市盈率8倍，息率有4.4厘，資產折讓五成，股價都咁表現，可見大市對地產股嘅興趣係點。
本港大小地產公司，好多都係資產豐厚，好似早兩日老牌中小發展商漢國置業(160) 同母公司建業實業(216) 公佈，漢國以代價逾31億元，向深圳上市公司陽光城集團，出售廣州天河區地產發展項目75%權益，預料盈利淨額可達22億元，當中建業應佔淨額15億元，兩隻股份復牌當日，股價齊齊飆升，錄得約20%升幅。喺復牌前漢國市值只有20億元，復牌後勁升都係25億，起樓起得咁辛苦，不如賣左地分水，可能對股東仲有着數O添。
陸羽仁
金融High Tea 舊文
來源 source: http://hdfin.stheadline.com