梁振英靠嚇？
2017年01月20日
特首梁振英發表《施政報告》，咁啱「民間特首」劉德華拍廣告墮馬，有人話劉華意外可能比《施政報告》仲吸睛。不過，中環茶友點都花咗幾個鐘聽振英最後一個報告，特別係留意佢點樣講土地供應。
振英喺講到樓市時，話增加供應漸見成效，未來幾年住宅供應會有
九萬幾個，寫字樓供應仲增加咗幾倍。講到樓價O依家仲未跌，佢就話當年搞八萬五，開頭大家覺得唔夠力，到後來樓市大跌，大家又覺得做得太多。現在話做得唔夠的人，將來當樓價大跌時，唔好話梁特首做得太多喎。言下之意，佢覺得地產係有一個周期，由覓地、推地、起樓，出售差不多要四、五年，即是他上任做嘅嘢，可能要落後先開始反映，O依家供應開始增加，若然遇著乜嘢因素不利樓市，個市一冧起上嚟可以好快，到時大家就唔好怪佢。
耶倫預測利息會升近3厘
振英講到咁得人驚，但佢上任以來樓價不跌反升，想買嘅人愈等愈急，部份人開始失去耐性，搞到超細面積嘅「納米盤」變咗潮流產品，佢卸任前咁講就俾人質疑係靠嚇。茶友話，振英任內住宅增加咗四成供應，呢個數字唔可以話好多，尤其下任如果無佢咁博命搵地，供應慢慢跌番，咁新增嘅供應唔算好多，所以佢形容嘅情況出現，前提之一係續任者要好似佢咁繼續增加供應，推低樓價嘅效果先至會出現。另一個情況係美國利息持續上升，令供樓能力大幅削弱。
茶友認為，唔應該太過低估美國息口上升嘅幅度，聯儲局主席耶倫啱啱表示，隨著美國經濟接近充份就業，通脹邁向聯儲局2%的目標，佢有信心美國經濟會持續改善，有理由漸進加息，若太遲加息，可能導致日後要更頻密加息。照耶倫嘅說法，現時美國失業率於4.7％左右水平，加上通脹回升，顯示經濟已接近聯儲局的目標，預計2019年底前會加息數次，屆時升至近3厘的中性息率，即不會刺激或拖累經濟增長的息率水平。
佢仲話，美國和全球息率走勢的差距令美元有升值壓力，美元強勢會持續拖累出口，承認聯儲局在作出經濟預測時會考慮美元匯率。由於匯價及息率會影響股票等資產的估值，投資者應該要考慮不明朗因素，如大幅加息或減息，雖然現時金融風險不高，但她提醒商品市場可能是波動的來源之一，衝擊美國以至全球經濟。如果美國利息升至3厘，咁按息就會拉高，屆時買樓收租就要個個月蝕息，亦會重回租樓平過供樓嘅年代，所以振英預言成真機會有幾大，同耶倫預測息口成真嘅機會其實係掛咗鈎。
耶倫評論美國經濟變相放鷹，港股夜期雖然高水，但開市就下跌，全日偏軟下恒指收報23049，跌48點；國企指數收報9792，跌10點，成交554億元。
東方海外繼續爆升
繼內媒日前爆東方海外(316) 有大動作醞釀後，《華爾街日報》引述知情人士透露，中國遠洋運輸(集團)總公司正就收購競爭對手香港東方海外貨櫃航運進行談判。報道仲指中遠集團擬向東方海外貨櫃航運提出規模逾40億美元的收購提議。如果建議落實，收購價比現時公司市值270億元仲高。雖然公司否認賣盤，但唔排除佢會出售重大資產，所以股價再大升7%，收報45.05元。
陸羽仁
金融High Tea 舊文
來源 source: http://hdfin.stheadline.com