搶開新盤谷股價
2017年01月04日
2017年首個交易日，恒生指數報升149點收市。有中環茶友笑言，恒指上年窄幅波動，去年全年升幅不及今年首日單日升幅。恒指成份股過去一年派息高過銀行存款，只要指數唔輸，投資指數基金或成份股基本上算是好過做銀行定期。今年是否如此，不能憑一日表現決定，
現時言之尚早，尤其美股在高位徘徊，不少分析均擔心會出現調整市。
新一年首個交易日大市氣氛好，理由之一是人民幣匯價開局表現比預期好。由於新年頭中央容許居民用新一年每年5萬美元的購匯額度，外界估計會再掀起換匯潮，加上在過年前外國通訊社搞出一個人民幣對美元破7的報錯價事件，在市場惹起虛驚，呢樣嘢可能都增加咗中央對匯價波動嘅防範，人行就加強咗行政限制，主要係兌換匯理由審核嚴格咗，講明不容許居民換匯出國買樓、買保險或投資，要申明並不是做這些事情才可購匯，都有少少阻嚇力。
人仔維穩頂高A股
結果據外匯交易員講，新年盤購外匯力量真係無預期咁強烈，加上大行適度提供美元流動性，人仔兌美元即期早盤低開後，延續窄幅整理，收跌62點子，報6.9557兌1美元；離岸人民幣則升55點子，報6.9684兌一美元，較在岸收市價低127點子。
新公佈的中國12月財新採購經理指數(PMI)51.9，創2013年1月以來最高，比預期的50.9明顯高，亦比11月的數字50.9高，顯示年末製造業加快擴張。財新PMI是非官方數字，反映中小企多一點，官方PMI反映大企多一點，但官方PMI在12月已較11月高位稍為回落，但財新PMI12月數字還在上升，是比較正面的消息，當然市場也擔心能否持續。
人仔匯價比預期硬淨，加上財新PMI比較好，令內地A股迎來開門紅，三大股指均小幅高開，上證指數全日收報3135點，升32點，升幅1%。
港股隨內地股市造好，午後升幅一度擴大，最多升189點，收市前升幅稍收窄，恒指收報22150點，上漲149點，國企指數收報9459點，升64點，成交493億元。若論指數表現，新年首個交易日算係唔差，但能否維持仲要睇幾樣嘢，首先係成交暫時仲係偏少，另外人仔匯價喺阿爺維穩下只是小回，但O依家中央係靠行政程序拖慢換匯過程，究竟內地居民使用今年新額度時對匯價嘅衝擊係點，可能仲要睇吓。
我覺得去年1月大家無預個市跌，就由人仔下插帶動而大跌。今年好似大家都預人仔和大市都可能跌，在上個月搶先調整咗，阿爺亦嚴防出事，唔排除個市會炒相反，喺特朗普上台前追吓落後。
新地受惠賣樓效應
藍籌股喺新年普遍向上，滙控(005) 跑贏大市，升咗1.2%，報63元，但比較明顯有追捧係地產股。由於上個月美國加咗息，發展商趁機繼續開盤，新地(016) 喺元朗嘅Grand YOHO二期首推166伙，搶先打響2017年頭炮，平均呎價17998元，並提供最高19.5%折扣，折實平均呎價14488元，差唔多係新辣招後元朗區開價最高新盤。
新地喺開盤前嘅例升效應發揮作用，升咗2.8%，升上紅底股，報收100.7元；會德豐(020) 升3.21%，報45.05元；新世界發展(017) 走高2.8%。由於加息後紅簿仔仍然係低息，本地收租股又彈吓，其中希慎(014) 、九倉(004) 大升逾4%，報53.8元；太古地產(1972) 升3.27%，報22.1元。本地房託基金亦靠穩，領展(823) 升0.99%，報50.9元；冠君(2778) 報4.21元，升0.24%；越秀房託(405) 收4.12元，升0.7%。
陸羽仁
金融High Tea 舊文
來源 source: http://hdfin.stheadline.com