Money Walker：
中港矛盾最新戰線
■中港矛盾戰線早已悄悄由自由行、搶奶粉等民生議題，擴展至商舖層面。 資料圖片
日前行過一間內地著名金舖嘅旺角分店，發現櫥窗內不乏天價玉器，大嗱嗱八百萬買一塊玉吊墜，心諗有人幫襯嗎？後來聽聞該店來港開舖，主力係為建立品牌形象
，只視開舖為向內地旅客宣傳途徑，拓展本港市場反屬次要。按此推斷，櫥窗內嘅天價玉器，金舖亦不指望賣出，實際用途係展覽多於展銷。
內地金舖來港開店「醉翁之意不在酒」，宣傳（又或者走資）為重，賺錢為次，但卻令港資同業頭痛，因為呢間內地金舖不惜以數百萬元月租於旺區搶舖，霸氣踢走原先嘅本地金舖租戶。但其實類似情況早已喺不同界別上演，好似中資機構來港投地，某程度上亦係以走資為主、擴展為次，不惜工本高價積極投地，鍊贏港資發展商，至於最終埋單於賣樓時有冇錢賺，則並非關鍵。
當港資企業因中資企業來港，而面對扯高舖租與投地成本增加等問題，所謂中港矛盾，戰線早已悄悄由自由行、搶奶粉、搶學位等民生議題，擴展至企業同營商層面，當然受影響嘅不限於企業界別。喺中港進一步融合下，地舖業主及政府庫房成為既得利益者，而港資企業與未上車嘅無殼蝸牛，則無端成為中港融合下最新被熔掉嘅一群。
中港融合多年，互惠互利仍僅限於少數人士或企業，內地走資更加導致上述經濟配置扭曲嘅局面越加成為新常態，倘若下屆特首有能力紓緩上述問題，筆者相信港資商人與一般港人，都唔會介意呢位特首大學係咪讀經濟系出身。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com