操盤手札記 - 割柑人 2017年2月16日
操盤手劄記：
搭重型卡車追落後
■港股昨日直搗24000關，但企唔穩，收23994。 朱永倫攝
股市升跌，都係錢作怪！上周有中資投資銀行爆料，一批原本用作海外併購、但舊年被中央叫停後泊喺香港嘅神秘資金，近日獲准在港買入中資股及藍籌股，自此港股連日爆升，無視一切收水、加息等不利因素。
港股昨日喺1,110億元大成交下，直搗24000關，但企唔穩，收23994，升291點或1.23%；H指收10436，升181點或1.77%。神秘資金上月已開始追入中資金融股，上周三起更大手掃入重磅內險、內銀；昨日工中建農四大行再被掃高，成升市功臣。過去5個交易日，港股日均成交近940億元，較1月份日均成交不足570億元大增近六成。係咪北水流入？唯一有官方統計嘅北水來源滬深港通，過去5個交易日嘅日均淨流入只約23億元，但內地私募基金及互惠基金就冇數計。
喺瑞信、大摩等外資大行唱好下，港股有望再上，但要進一步升抵25000關，就要有更多資金流入先得；而且港股急升後，或需先行整固。睇牛熊證街貨分布，熊證下一重貨區喺24100至24149，有相當於約530張對沖期指；牛證喺23300至23349，有約600張對沖期指，喺23150至23199更有約850張。睇牌面，向下屠牛誘因較大。
資金輪流炒，近日落鑊嘅仲有汽車股。喺吉利（175）染藍下，車股紛紛踩油。本欄舊年12月8日推介吉利，至今升幅超過三成，高追無謂，而且今年汽車購置稅優惠減半，乘用車增長有暗湧，最新數據顯示，1月乘用車銷量按年下跌9.8%，反而商用車有睇頭。
喺中國基建投資加速下，中國重汽（3808）作為中國第三大重型卡車製造商，佔市場份額超過三成，勢必受惠，不失為追落後之選。重汽1月銷量按年增加117.8%。春節後為重卡旺季，2月行業增長料加快；而且重卡嘅更新周期一般為5年，上一個需求高峯喺2010年，市場估計今年換車潮持續；加上內地限制貨車載貨量，亦令需求增加10%至16%。睇走勢圖，重汽呈三角突破，現價6.03元，上望6.8元。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com