看風駛舵炒內銀
2017年02月16日
大戶兩個字寫起上嚟雖然只係得一個口，但做起上嚟就兩個口，好似美國聯邦儲備局主席耶倫放鷹，話加息唔可以拖，但美股升完，港股亦炒起，仲喺去年10月以來首度升穿咗24000點，成交仲上到1110億！
港股上升動力之一，係大摩唱好內銀股，話利息向上
對佢哋嘅邊際利潤有好處，佢哋正係上升周期咁話。外資喺一年前仲話緊中國銀行債務係炸彈，突然又有人講到炸彈變咗金礦，你話係咪乜都畀佢講晒先？
外資轉軚唔使本
隔晚美股早段偏軟，市場觀望聯邦儲備局主席耶倫在國會作證，耶倫話等待加息不宜過久，個市呆完後由銀行股受帶動，加埋蘋果公司股價亦造好，令美股再創新高。美國銀行股大境，做國際業務嘅滙控(005) 都受惠，股價一度高見68元，創一年新高，收報67.7元，升逾1%。
美國金融股預期監管放寬炒上，大摩就吹起「摩笛」唱好內銀股，預告預期北水南下，幾隻中資銀行股於60日內一定升，料中國銀行(3988) 、建設銀行(939) 、招商銀行(3968) 、重農行(3618) 、農業銀行(1288) 將可受惠，為股份上升的催化劑。
大摩嘅報告話，隨著投資者對中國銀行業資產質量下降的擔憂減弱，預期內地銀行股今年應該有非常好的表現。上述內銀吸納存款及融資能力良好，較其他內銀更能受惠，派息比率又是「愛息」一族的心頭好。大摩係畀「增持」評級外，仲實牙實齒咁將亞太區(除日本)金融股模型投資組合中，把內銀股的比重由27.5%調高至35%；將香港銀行股的比重由25%提高到27.5%。
受消息帶動，內銀股幾乎全面攀升。大摩轉軚轉得好快，大戶錢多，呢個係現實，散戶最緊要識看風轉舵，順勢炒吓之餘，知道自己做緊乜。內銀股喺過去幾年被外資踩到盡，但佢哋嘅股價去到咁上下再推唔低，其中一個係佢哋市盈率低，6倍PE、5厘息，管理層保持派息去頂住股價。由於內銀係國企，龍頭股都係大到不能倒，有息派坐貨風險有限，呢個係我過去幾年話低位可以買嘅原因，因為低價入嘅貨，派息回報高，咁捱價都易頂好多，坐艇都唔會出咗大西洋，潮流順番就有機會收息賺價啦。
內銀股為升市主力，恒指最多升咗364點，見24067點，創逾5個月新高，其後出現回吐，恒指收報23994點，升291點；國企指數收報10436點，上揚181點，恒指升1.2%，國指升1.8%，成交增至1110億元。
僅建行(939) 已為恒指貢獻99點升幅，計及工行(1398) 及中行(3988) 三行合共為恒指貢獻168點升幅，建行周三突破6元，收報6.27元，升5.03%，成表現最佳藍籌；工行升2.82%，報5.1元；中行升3.93%，報3.97元；招行(3968) 升3%，報21.3元；農行(1288) 升6%，報3.63元；交行(3328) 升2.8%，報6.18元。
美國蘋果公司獲批新iPhone設計專利，加上獲巴菲特於上季增持，公司股價周二於美市再創新高，帶動部份本港上市的手機設備股造好，其中瑞聲(2018) 升2.5%，報88.35元；富智康(2038) 升5.5%，報3.09元；舜宇光學(2382) 漲6.2%，報54.05元；高偉電子(1415) 升4%，報2.81元。
成交過千億添熱鬧
呢排內資股猛借政策消息炒上，內地官員話中國於「十三五」期內將更加重視核電發展，刺激核電股造好，中廣核電力(1816) 急升6.6%，造2.44元；核電設備股上海電氣(2727) 升7.8%，造4.03元；哈爾濱電氣(1133) 升3.5%，造3.87元，成交一增，個市即刻熱鬧好多。
陸羽仁
金融High Tea 舊文
來源 source: http://hdfin.stheadline.com