智取大市：
輕易贏錢靠騰訊
■騰訊有望重拾過去強勢。 資料圖片
恒指9日RSI已經升到84.8，回想起舊年9月9日，港股就嚟呢個嚴重超買水平，同時有單日千億成交之下……就咁見頂。睇番今次情況卻有幾多不同之處，第一，連續兩日成交過千億，買需比舊年9月見頂時只一日千億成交為強；第二，9月9
日一役，指數急衝然後尾市急回，上落甚大，噚日成交過千億但恒指波幅不足200點，牛皮都咁多成交，買賣活躍程度遠勝舊年高位；第三，噚日升勢並不全面，內銀、騰訊（700）升，唔少二三線股回吐，反映未發揮到雞犬皆升嘅極限。
由此可見兩日共通點太少，參考價值唔多，但幾可肯定今時今日比起舊年9月強得多，之後會點呢？港股始終會整固，之後較大機會出現多一浸更短促嘅破頂升市，形成RSI頂背馳，希望今次真係有呢個最後機會吧。
騰訊突然由近期宇宙最弱變為強勢股，似唔似龍尾股？若然話一隻長期超強勢股出現調整後反彈，而反彈幅度已超過調整幅度嘅黃金比率0.618（即股價205元），確認股價已擺脫跌市，咁就好難話係龍尾，反而重拾過去強勢嘅機會仲大，試問內銀股都可以抽爆機，騰訊又點會跑輸？相信買騰訊係一條最低難度、但回報又未必低嘅飛。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com