智取大市：
2月迎炒股淡季
■2月炒股操作料趨困難，絕不能期望有1月份嘅好景。 資料圖片
2月初聯儲局議息已過，下一次議息時間係3月14至15日，由於今年要加兩至三次息，所以往後議息嘅機會率亦會逐步提升，壓力會逐漸逼近。
不穩定情緒開始反映喺市況之上，周三港股借壞消息低開再向下插，然後
拗腰反彈；周四平開乘勢衝高百幾，然後即掉頭插水百幾，兩日都嚟即市轉向，喺呢兩日好有機會左一巴、右一巴，為嘅係懲罰短線客。
大市高位chok上chok落，的確有啲似去年3月終極短線升勢之前，但今次能夠接力急升嘅藍籌股唔多，所以幾百點上升空間已算樂觀劇本。市況不就，想炒股不炒市？空間亦已收窄。通脹主題股份累積升幅已多，再要搵新主題寸步難行，能夠炒上嘅股份板塊少咗。2月份維持喺23000點以上嘅時間，持倉至少要比1月份低一半。
2月有兩種做法，第一種係上期所講：一隻買完，lead住先買第二隻，要贏人先要保本；第二種玩法係唔跌唔掃貨，但又未睇到有爆煲跡象，跌極有個譜，如果大市跌番一千點或以上，冇新壞消息，相信加息等等嘅舊壞消息反映得七七八八，到時可以睇位撈。總之2月份操作比1月份更困難，絕不能期望有1月份嘅好景，要小心行事。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com