陸羽仁 BLOG 2017年2月24日
31000點?
2017/02/24 08:36:03
網誌分類: 經濟
港股衝上二萬四後，大行開始上調恒指目標價，繼瑞信升目標價至25500點後，摩根士丹利亦發功，將恒指今年目標上移8%，由24000點升至26000點；最牛預測就由30500點增至31000點。佢充份顯示一個好市睇好的特色。
瑞信在周一將恒指年底預測由24500點，升至25500點。大摩亦唔執輸，將恒指及H指目標價上調，基本情況下恒指睇26000點，國指睇11300點，恒指距離昨日收市價8%，國指距收市價高7%。
大摩又同時將恒指的「最牛」預測由30500點稍稍上移至31000點，國指「最牛」預測則由13000點升至13400點。
大摩話，今次目標價調整主要基於人民幣的預測貶值幅度低於早前預期，那麼因匯率對企業盈利的拖累也會減低，加上對內地今年全年經濟增長預測亦上調，該行對企業盈利的看法已較之前樂觀，故一併上調恒指及國指目標價。
我就話外資今次俾中資食咗夾棍，外資去年底跟風睇淡人民幣匯價，見到去年12月人仔大跌，睇今年人仔睇便更淡，對股市也唔敢睇好。但過完年人仔挾上，北水順帶落嚟炒港股，外資反應慢，得過睇字。
而今炒到慶時，外資被逼跟住睇好，否則會被客鬧，但北水部署係點，外資根本唔知，而家大摩即使微調最牛價到31000點，亦會被人理解為睇31000點，佢真係信港股會見31000嗎?
我就估北水唔係諗住長炒，係炒一轉就走人的感覺，炒國企多過藍籌，所以最後恒指可能比大摩估的低，國指可能比大摩估的高，不過最重要的是不要期望由年頭炒到年尾，年頭炒得越高，越可能見咗高位，下半年唔係會上試更高，而係北水一走，我地就要捱。中共第四季開十九大，之前亦可能會有人搞局，所以年中過後，我就唔敢睇得太好了。
另外講講外圍，歐洲亞洲等外圍股市回軟，不過，美股繼續表現螞蟻爬樹，杜指10連升，再升35點，收20810點；標普500指數升不足1點至2364點。當中公用股升1%，領漲大市。
美國財政部長姆欽（Steven Mnuchin）發表有關稅務改革的消息後，美股升幅收窄，但以升市收場。姆欽昨日接受CNBC訪問時表示，他要見到「非常重要」（very significant）的稅務改革，能夠在美國國會8月休會時通過。這是他上任以後首次在電視上講話。他說，白宮正如與兩院議員緊密合作，制定一個綜合性的稅務計劃。他這樣講令市場認為稅改會比預期遲通過。
特朗普此前曾經承諾在這幾星期內提出稅務改革建議，但他對計劃內容卻隻字不提，分析都在玩猜謎遊戲：究竟會是在競選時建議的版本，還是眾議院共和黨建議的版本？（參議院沒有什麼有關稅務上的提議）。不過，分析普遍預期國會會於下個月推翻「奧巴馬醫改」（ObamaCare）的部分法案之後，才會把稅務改革提上議程。
稅務改革係推動「特朗普升市」的三大催化劑之一，其餘的是放寬監管條例以及政府增加基建開支。有分析指出，投資者在希望和預期推動下，造成了美股目前「高追，更高沽」的市況。不過，值得注意的是，向來視為避險天堂的美國國債市及金市，昨日在姆欽發話、美股上升時造好，美國十年期國債息率由2.4厘上方回落至2.387厘，而2年短債亦由1.21厘下滑至1.192厘。4月期金則升18美元至每安士1251.4美元。
Tower Bridge Advisors總裁Maris Ogg認為這反映了市場出現很大的疑惑。主要是對於美股能否維持在這樣高的水平。他相信投資者現時焦聚在特朗普可能行差踏錯，多過他所提出的美好願景，例如全球經濟正在改善等等。
陸羽仁
回應總數
陸羽仁 BLOG 舊文
來源 source: http://blogcity.me