炒賣樓股要識走
2017年02月24日
美股港股升到去高位開始有啲阻力。前日恒指升破兩萬四千點，昨日再現回吐功力，睇嚟個市要進入消化期。美股杜指係衝破兩萬點後氣勢如虹，但升得太多大戶開始搵啲理由食胡。高盛分析員就話，預期美國經濟增長可以有3%太過樂觀。當總統特朗普公佈佢嘅減稅同政府瘦
身方案後，市場慢慢會發覺高估咗措施嘅效應。
華爾街嘅好友唱好大市，可以分開兩派，一派係對新政有期望，相反另一派就認為美股表現無關政治，皆因經濟有其運行周期，美股而家正踏入低通脹、高增長、低失業的牛市循環，所以唔理邊個做總統同政策方向，短期股市都會向好，股神巴菲特就係呢派睇法多啲。從呢派人嘅觀點，新政刺激高估只係短期調整嘅理由，不影響中線趨勢。
政府好難再加辣招稅
而家市場回落，主要係累積升幅大，加上三月份始終聯儲局都會議息，而利率期貨市場反映，而家仲有兩成七機會加息，雖然機會仲係唔大，但都有啲低位入咗市嘅投資者都想鎖定部份利潤先。
美股升勢要消化，港股都進入阻力範圍，前日升勢要靠落後嘅地產股支撐。幾隻賣樓多嘅股份好似新地(016) 、會德豐(020) 都衝上高位。樓價貴，大行瑞信認為，雖然新一份《財政預算案》對樓市影響屬中性，而且新年度賣地計劃，涉及32000個單位，中線而言，將對發展商構成壓力；但由於樓價短期仍會向上，為樓市「加辣」構成壓力。
中環茶友對於呢個分析就不敢苟同，佢話政府幾年前推出辣招稅，結果不但無壓住樓價，而且仲益咗發展商利用提供稅務優惠賣新樓，所以辣招稅只打擊到二手樓成交，打擊不到新樓成交。政府不斷出招加辣，二手靜晒，新樓照樣去貨，地價樓價愈高，庫房同發展商賺得愈多，而內房商來港猛咁掃地，咁咪即係叫香港人唔好買樓？高官而家都開始睇到呢個情況，所以佢就唔信政府會再加辣啦。
茶友話，呢兩日地產股炒作吓，估計好大理由都係炒業績，因為過去兩年樓價升多跌少，而且新盤去貨甚多，所以而家升得好嘅都係呢兩年賣樓多嘅地產商。好似新世界發展(017) 公佈截至去年12月底止中期多賺31%，隨即獲多間大行唱好。
摩通予「增持」評級，目標價10.2元；星展唯高達更予「買入」評級，目標價更睇11.26元。呢浸咁嘅升勢可以嚟得好急，但都可以散得好快，夠膽短炒都要預咗勢色唔對就走頭。新世界發展(017) 逆市升3.3%，報10.1元，成表現最佳藍籌。
敲冷食藥炒番轉
個市炒到地產呢啲落後板塊，好難再快手快腳急升，前日恒指上咗高位，昨日就要調整，恒指全日收報24114，跌咗87點；國企指數收報10521，跌16點，成交818億元。炒落後逐瓣搵，借住內地發佈新版藥品目錄，涵蓋的藥品數目約增15%，消息刺激本港上市的藥股上升，獲大摩唱好的三生製藥(1530) 大漲20%，報9.11元；吉林長龍藥業(8049) 大升11%，報1.94元；遠大醫藥(512) 升6.3%，成為典型嘅敲冷食胡。
陸羽仁
金融High Tea 舊文
來源 source: http://hdfin.stheadline.com