急升要食胡
2017年03月21日
港股昨日再升，但話題唔係個市可以升幾多，而係幾隻科網股上午爆炒，跟住下午轉向急插，高追嘅股民而家要捱價，高追食左胡嘅，就當然開心等機會翻兜。
美圖chok到嘔黃膽水
呢排港股氣氛唔錯，但指數上到高位風浪開始有啲急，個別板塊升得急，單日就已經
顯著回吐，最多人講嘅係北水股美圖(1357) ，佢昨開市無幾耐就爆上，食飯前最高去過23.05元，急升5元，幅28.1%，創上市新高，但於下午2時半過後，該股崩盤式急瀉，一度倒跌14.4%至15.4元，之後略彈，全日報15.98元，仍跌11.2%，成交額38億元，我估當中有不少都係即日鮮，得唔得都唔過夜。
美圖從高位回落左7元，摸頂入貨者真係chok到黃膽水都嘔埋。美圖同做手遊嘅IGG(799) 上午發力，帶動呢個板塊嘅股價紛紛跟上，IGG股價早排都係徘徊係5、6元水平，過去一個星期跟住北水炒作攀升，昨日高位急湧上8.88元嘅一年高價，升左16%，下午一樣係在兩點半後急回，然後亦有反彈，結果收報7.9元，都仲有3.4%升幅。
睇番美圖而家仲未賺錢，所以買佢得個信字，內地資金對佢嘅服務好有信心，所以佢上左深港通名單後就一直係咁升，但升到咁急有貨在手者真係無理由唔食吓胡先，一插就人人都止賺走人，結果升得急跌得勁。由於公司仍然未賺錢，高追揸左呢啲概念股特別熬骨。至於隻IGG本身有錢賺，雖然都升到近40倍PE，但佢嘅生意範圍比較窄，屬於有數得計嘅公司，佢嘅業務成熟好多，股價想像空間無美圖咁大，佢急升見頂回落，除非科網股繼續癲炒，否則短期唔易再見高價。
幾隻科網股中，最穩陣當係巨股騰訊(700) ，佢再創新高收報228.2元，升左2.8%，亦係全日最高位。騰訊嘅地位係內地接近壟斷，業務優勢鞏固，雖然歷史PE炒上61.7倍，但同美圖仍然屬於概念股唔同，大家炒佢係博佢周三公佈業業績靚仔拉番低PE。市場而家估佢有30%增長，由於佢嘅生意模式優越，風險無咁高，回報同樣無咁高。
炒美圖呢類概念股，大家係膽博膽，若然博中佢股價急升，咁就應該考慮先食胡等機會再買，至於好似IGG呢類其實唔算好有概念嘅股份，由於同屬科技股，股價突然出現概念股式急升，就更加應該賺左先算啦。
有爆棚唔好等雙辣
呢排個市熱熱地，個別板塊升到高位之餘，開始吸引散戶追入，好似上個星期汽車股同內房股都有呢個情況。呢啲板塊以佢地傳統嘅估值嚟講已經升到近年高水平，撞到急升超買更加厲害，有貨股民有幸遇到呢啲機會，千祁唔好嫌爆棚太細唔食，係都要食雙辣，因為而家點講都未係大牛市，有胡唔食好易晒。高位沽左，有機會可以轉吓跑道，又或者等機會候低再買，點都好過死坐唔收割。
講番大市，昨日在騰訊等重磅股帶動下向好，恒指收市前一口氣突破24500，以全日高位收市，恒指收報24501，升192點；國企指數收報10583，上揚70點，成交金額978億元。神華(1088) 去年多賺41%兼派特別息，周一股價急升16%，報19.14元，為表現最佳藍籌。現貨煤價向好，部份煤炭股亦造好，其中和嘉資源(704) 升8.5%，報0.255元；中煤能源(1898) 升4%，報4.18元；兗州煤業(1171) 升3.7%，報6.44元。騰訊股價屢創新高下，部份科網股也獲資金追捧，百富環球(327) 漲9.3%；網龍(777) 升7.8%，報24.9元；雲遊(484) 、天鴿互動(01980) 升6%，報5.03元。
陸羽仁
金融High Tea 舊文
來源 source: http://hdfin.stheadline.com