財經評論：
有錢都買唔到新盤
■上周六的匯璽售樓處，秒秒鐘幾十萬上落。 資料圖片
上周五、六，三大新盤包括新地（016）南昌站匯璽、會德豐（020）將軍澳Monterey以及長實（1113）馬鞍山星漣海，夾埋賣出900幾夥，吸金100億元。兩日時間，48小時，即是平均每小時有超過兩億資金到發展
商手中，一個鐘頭搵兩億，可想而知，香港地通街都是千萬富翁。
記者上周六到新地匯璽售樓處採訪，真係見證住秒秒鐘幾十萬上落，連大手客時段都幾百人到場，但到中午12點半左右，突然間有批客戶一窩蜂散水，原因是由於A組限定買家一定要買最少一夥4房，當A組59夥4房戶全數被認購後，已無4房單位做膽，不可以繼續揀樓程序，致現場湧現數以百計A組向隅客，呢一批向隅客，個個都擁有四、五千萬購買力，身家億億聲是基本，但結果一樣冇樓揀。嗰一刻，或許令人覺得，原來呢個世界，有錢都唔一定大曬。
資金充裕成咁，難怪市場有一大班唱旺的友仔，又話今年一定再有水位上，摸頂呢兩個字，好像已經冇乜人知係乜嘢嚟。反而問買家意見，都好多時佢哋都會話「驚遲買會仲貴」，更加上唔到車，更有買家坦誠，都係俾氣氛令到自己想買樓，唔係好理智。
咁樣升法，的確好難令人理智，加埋有一大班中資不理智地高價買港地，港島南一個島仔鴨脷洲，誕生了香港地王，所以與其話買樓的瘋狂，其實買地的仲更加癲喪。
記者：黃嘉銘
財經評論 舊文
來源 source: http://hk.apple.nextmedia.com