拉牛上樹
2017年03月03日
美國總統特朗普係國會演講，一向同佢唔啱嘅美國媒體做嘅民調，就話民眾對佢講話非常受落。特朗普無鬧人已經當做好消息，美股再度燃點「特朗普希望」，美國杜指大力爆上，一舉衝破21,000點，收報21116點。
加息利美股不利港股
美股大漲，港股係外
圍嘅預託證券造好，以為佢會跟勢小炒，但大市高開百零點，已經唔係好夠力，跟住升幅愈縮愈小，最後倒跌左48點收市，呈現一種弱勢。
美股牛氣沖天，港股就拉牛上樹，造成差別嘅原因之一，係同息口有關。特朗普係國會為人民描繪出一幅美麗圖畫，講到底都係繼承左民主黨嘅餘蔭。好反對特朗普嘅股神巴菲特，係大選後繼續入市，皆因佢認為唔理邊個做總統，美股牛市已成。
喺奧巴馬做總統嘅八年，美國瘋狂放水頂住經濟，呢兩年美國開始復甦，經濟步入加速階段，過去政府泵入金融體系的資金因為擔心風險大舉流入債市，而家因為環境穩定番流入實體經濟同債市，所以就算聯儲局停左量寬，但因為資金流動加速左，所以景氣持續升溫，情形好似大病初瘉嘅人開始郁番，隨住運動量增加，體魄愈嚟愈壯，所以股神話特朗普做唔做總統無所謂，股市會因為佢講嘢搵嚟炒，呢個亦解釋點解聯儲局出嚟放鷹，美股窒一窒後反而大上，皆因加息被理解為經濟好。
有中環茶友話，若然講受美股帶動，可能日股仲好過港股，好似日經平均指數收報19564點，升左171點，所以日股嘅ETF都有得諗。同樣，睇番美股領漲的是金融股同能源股，杜瓊斯金融指數勁升2.8%，主要的銀行股都創出52周新高。其中美銀升3.3%、富國銀行2.9%、摩根大通2.6%、高盛2.4%，反映市場係炒加息有利金融股。
同樣加息對香港的影響就唔同，香港經濟而家唔係復甦初期，而係高位徘徊，特別係樓價癲升，好多人都驚加息加出禍。去年有樓市明燈睇樓價跌一成，呢個星期又睇樓價升兩成，燈神咁樣翻來覆去，就說明個市好唔穩定，令人擔心，加上美國加息在即，美匯轉強，對香港嚟未必咁有利，搞到香港拉隻牛上樹，拉拉吓跌番落嚟。
金融股順手小炒
雖然港股由升轉跌，不過金融類普遍跟住外圍有炒作，宏利(945) 、滙控(005) 、渣打(2888) 都造好。呢類跨國金融股係年頭升市都造得唔錯，但跟住公佈嘅業績就唔係好得，股價出現調整。市場人士原本估計三月份加息機會唔大，呢類股價暫時無得炒，但呢個星期儲局突然提高左市場對加息嘅預期，咁又令呢類股份嘅氣氛改善。美國三月份加息機會而家一半半，但就算三月份唔加息，利率上調嘅預期，都有利支持佢地嘅股價。
藍籌股中，滙控幾乎係一枝獨秀有得升，收市升1.03%，收報63.55元，可惜佢獨力難支，恒指係一度高見24080，升幅達304點後掉頭，收報23728，跌48點；國企指數收報10246，下滑41點，成交821億元。
跨國金融股造好之餘，中銀監指內銀去年淨利潤增3.5%，並正積極進行債轉股，帶動左個別內銀股個別發展，重慶行(1963) 升0.74%報6.83元；招行(3968) 升0.48%報20.85元；郵儲行(1658) 升0.42%報4.8元；天津銀行(1578) 漲0.38%報5.29元；徽商銀行(3698) 升0.25%報4元。
陸羽仁
金融High Tea 舊文
來源 source: http://hdfin.stheadline.com