內房股遇彈食胡
2017年03月30日
中港樓市近日都頻吹打壓風，內地樓市係首季持續升溫，各地不斷出招。投資中字股，要訣之一是跟著政策走，既然中央要調控樓市，內房股升左咁多，咁佢地可能短期已經見左頂，有機會就可以遇彈食胡。
呢排中港樓市都受關注，內地早已出招壓，香港只係傳傳吓，外
資大行花旗話逢周五就要睇吓特區政府會否出招加辣。
中環茶友笑言，呢啲叫做偷雞落注，皆因樓市升得咁勁，你話政府想加辣實有人信，問題只係出邊招啫，好似花旗話加差餉，茶友好懷疑之餘，覺得無論特首振英同財爺茂波，都同金融界唔熟，佢地點會漏料政府諗緊邊招呀？至於話星期五要留神，呢啲唔使用統計都估到，過去香港出親辣招都揀周五股市收市、樓盤周六開賣前宣佈，如果政府真係出招，咁花旗話星期五呢個日子好易中，問題只係出唔出招同出乜招。
反而大陸省市呢排頻頻出招就真實好多，啱啱北京就宣佈左，嚴禁中介一年內買賣同一套房，用嚟打壓短期炒賣。據內媒報道，北京嚴打樓市造漲嘅氣氛，發改委同價格監察局呢排就嚴查銷售數據，有無捏造漲價，仲要求開發商、經紀唔好炒作學區房、高價房，嚴禁經紀一年內買賣同一套房。北京連一年賣買同一套房都要禁，真係禁到無嘢好禁咯。
調控一招唔得再一招
大陸樓市去年猛漲，今年勢頭持續，兩會之後地方政府調控手段明顯加密左，睇嚟政府想壓住樓價，一招唔得又一招，總之乜都查吓，以求達到控制樓價目標。係政府加大力度控制下，樓市不怕官、最怕管，相信短期都會降溫。
早排，內房股一擁而上，累積升左唔少，巨型股如碧桂園(2007) 和恒大(3333) 都升唔少，係政策唔想樓價繼續攀升下，內房股好可能已經見左短期浪頂，呢排佢地股價回落，抖一抖又炒上。恒大績後獲花旗等大行唱好，開市微跌逾2%後即見買盤湧現，全日急升9%報6.95元，昨日衝上過7.07元，貼近早前高位；而碧桂園昨日雖然微跌0.6%，收7.14元，但都好近全年高位7.4元。日前復牌的佳兆業(1638) ，市場憧憬其去年全年有望虧轉盈，股價升11.2%報2.77元。
現在的環境是炒味濃的內房再抽，大股如萬科(2202) 和中海外(688) 已經比較腳軟，我話如果手頭有內房股，怕佢地今年高位已見，趁佢地彈高可以先食胡。
港股呢排比較反覆，大市午後更曾出現倒跌，尾市發力回升，恒指收報24392，升46點；國企指數收報10437，漲11點，成交金額773億元。
入股Tesla的騰訊(700) 一度高見230.2元，再創上市新高，收升0.89%報228元。
騰訊入股Tesla 打窒比亞迪
騰訊斥資百幾億入股美國電能汽車生產商Tesla，入股5%成為公司第四大股東。消息公佈之餘，遇上內地電動車比亞迪(1211) 宣佈業績。唔知係咪受到潛在競爭對手強強合作影響，比亞迪業績雖然增長強勁，但股價依然要跌逾3%。
比亞迪去年淨利潤50.44億元人民幣，增長79%；每股盈利1.87元；派末期息17.8分。佢去年營業額增長29%，至1002億元，首次突破千億大關。去年內地車市好景，唔少汽車股都大升，相比之下，買比亞迪回報唔算太吸引，佢係公佈靚靚業績下倒，都有可能係好消息出貨。比亞迪在內地新能源汽車市場一向係大哥，呢次騰訊入股Tesla，令人關注會唔會令比亞迪係大陸市場遇上強敵。騰訊而家係手機社交媒體的一哥，Tesla係研制無人駕駛導航投入好大資源，外界相信呢個係兩者合作誘因。隨著對手出新招，下一步要睇比亞迪點樣回應。
比亞迪主席王傳福由搞電池到搞電動車，成為千億營業額企業，佢下一個大計係設計電動集體運輸系統「雲軌」，管理層宣稱若然成功，將成為另一個產值千億元嘅產業，而家外資可能加大力度搶攻中國電動車市場，比亞迪就要小心兩條戰線同時受壓。
陸羽仁
金融High Tea 舊文
來源 source: http://hdfin.stheadline.com