智取大市：市場冷靜係好事
■正通汽車股價於高位企得穩。 資料圖片
上星期可謂幾得意嘅一個星期，雄安新區利好消息，整體港股只反映一日兼升幅唔多，個別細價概念股有炒作，但談不上亢奮。去到清明假期後港股有震倉，以為好消息唔升，市底麻麻之際，去到星期五有美軍炸敍利亞嘅壞消息，炸傷港股時間只有
一個上午咁大把，下晝幾乎完全收復失地，唔見借勢向下插。去到周五晚美國公佈3月非農就業數據遠遜預期，美股以至港股黑期都唔跌。好消息冇升，壞消息冇跌，唯一解釋，係投資者呢個moment相當冷靜。假如指數唔上又唔落，其實都唔算太差，起碼有股炒。
金屬股都有初步轉勢跡象，港股舞上舞落，中鋁（2600）周五收市價4.07元，股價明顯比周一反映雄安新區消息當日收市價3.92元為高，特朗普射飛彈，股價震都唔震嚇，表現唔錯。正通汽車（1728）由2月下旬到3月中旬半個月內，股價由3蚊衝到近5蚊，其後大半個月整固，大chok一輪後波幅收窄，成交轉靜，但股價於高位企得穩。正通為內地寶馬分銷商，憧憬寶馬銷售復蘇，理由、概念夠簡單清晰。貴為港股通活躍股，如港股氣氛回復，正通以旗形向上突破機會唔細，係短線備忘之選。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com