笑到最後：不問價追中國城軌
■中國城軌從事鐵路設計、建造、維護及系統服務等。 資料圖片
港股未能突破，上星期五大跌後近乎V形平收，證明處於「市底強、市面弱」格局，升跌一樣
難。但好多板塊仲有力炒上，最餓狗搶屎嘅就係雄安概念股，成個禮拜係一梯隊接另一梯隊咁炒，其中有一隻有京津冀概念而完
全未炒過嘅股，就係中國城軌（1522）。
中國城軌從事鐵路設計、建造及維護等，近年逐步參與建設地鐵，喺北京地鐵有多個項目。該股母公司係京投，亦係京投唯一境外上市公司。中國城軌2014年嚟陸續收購京投旗下北京地鐵11條線嘅地鐵民用通訊資產，2016年業績寫明「在《京津冀協同發展規劃綱要》……等關於城際鐵路和城市軌道交通的發展規劃的支持下，預計本分部的表現將得以改善」，國企背景加上地鐵營運經驗，比起雄安股更有概念。
一個城市發展，最先要鋪橋起路，雄安概念股先炒水泥股金隅（2009）都叫合理，而鐵路喺中國嘅重要性不下於房地產，因為有地鐵站上蓋就有樓炒，連日來雄安炒風竟然係炒區內水務股、燃氣股，甚至係天津嘅港口股，最離譜係炒總部位於嗰區嘅長汽（2333）。連最無厘頭嗰隻都炒，即係雄安概念股好缺市啦，中國城軌有計劃投鐵路經營嚟做，雄安亦一定會起鐵路，概念上食到應。
再加上中國城軌喺股本發展上有野心，2012年先以創業板上市，當時京投只佔股權不足一成，至2013年底轉主板，注資加上港股大時代，最高炒上3.9蚊，之後股價就一路碌返落嚟。舊年9月以每股1.35蚊折讓配股予京投香港，持股量由34.03%增至55%，成為絕對控股大股東，現時股價回落到京投入股水平，值博率甚高，而資產淨值每股1蚊，近期股價喺1.3蚊水平明顯見底，加上雄安概念突然公佈帶來憧憬，仲聲稱係「千年大計」，消息肯定陸續有嚟。
雄安概念公佈後，龍頭股金隅最多炒高63%，回吐一日到周五仲有力彈證明概念未完。中國城軌完全冇炒過，保守估計炒風只有金隅一半，初步目標價1.79蚊唔過份，現水平值得不問價追中國城軌！
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com