特朗普不硬 貿易股有運行
2017年04月10日
上星期五的股市極具戲劇性，正當習主席訪問美國期間，特朗普突然下令向敍利亞發射59枚巡航導彈，聲言要針對阿薩德政府使用化武。消息震散早段股市，恒指一度急挫300點。不過，大家都估到這種打仗市，不會持續。
美國發射導彈之後，恒指跌唔夠
一個鐘就收科。港股當日10點9之後不斷反彈，最後微跌6點收場。散戶朝早無定力被震倉沽貨，就喊都無謂啦！
導彈市玩唔到一個鐘
俄羅斯和敍利亞友好，特朗普向敍利亞政府軍基地射導彈，擺出一副對俄羅斯總統普京強硬的姿態，睇嚟好似要為佢轉軚向習主席示好打掩護，分散美國人民注意力。
「習特會」以中美友好的格局收場。特朗普一如所料，在競選時喊得震天價響，聲言要對中國進口美國的貨品徵收45%的高額關稅。當選後亦一度「頑皮」，與台灣的總統蔡英文通電話。不過，在他的女婿、資深白宮顧問庫什納與前國務卿基辛格的大力拉攏下，特朗普回復常態，與習近平親切對話。
當然，習近平出訪美國前，兩國已講掂數。特朗普不會在「一中」問題上整古做怪，阿爺盡量在貿易方面配合，結果會面和氣收場，兩國會在包括軍事在內的四個領域上建立恆常溝通機制，同意在百日內就貿易問題上公佈磋商結果。
另外，習主席邀請特朗普到中國進行國事訪問。
由發射導彈和「習特會」，可以見到特朗普是非常現實的生意人，噏得就噏去爭取選票，作出很多反華承諾，到最後都擺明不會找數；請不到選民食中餐，便隨便請飲羅宋湯，胡亂擠出一些東西來交功課。特朗普已經70歲，仍然可以呃到一個總統嚟做，足以證明他確有一套蠱惑招。
中國唔輸 日韓台找數
在「習特會」中，特朗普似乎無提中國的人權問題。在莊園會晤中，特朗普更叫外孫女向習近平大唱中文歌苿莉花，友善到有啲誇張。想叫特朗普反華的人，例如台灣的總統蔡英文、日本首相安倍晉三全部落錯注，特朗普只是借他們過橋，增加對中國談判的籌碼。
特朗普一改過去「民主、自由的理念總統」策略，改行做一個「美國優先的實利總統」。美國正大力吸引台商到美國投資，勢將台灣空洞化，特朗普還會叫日、韓為美國駐軍找數，不想為駐亞洲美軍埋單，可以話連自己友都抽水，但對經濟實力強大的中國畀足面。
特朗普點解要做到咁cheap？ 因為他不是美國主流精英支持的總統，無人無物只能靠自己，他想在4年後連選連任，一定要快速做出成績，增加美國就業、減少公司交稅，做到打工仔和老闆都鍾意佢。
明白特朗普的算盤，中國會識做，美國想減少對華貿易赤字，中國一係減少對美國出口，一係增加對美國進口。估計中國既唔想人民幣大升值，亦唔想減出口拉低本國經濟，最好方法係增加入口美國貨，或者可以減少日、韓、台入口，撥條數畀美國，咁美國又高興，幾個美國跟班國家或地區又唔敢嘈，中國咪做咗順水人情囉。例如經常查到日、韓、台入口水果有蟲害，咁咪可以入口多啲新奇士橙。
中國前景 睇好一線
當然特朗普另一關注係龐大的基建計劃有無人去投資，呢樣嘢就係睇美國敢唔敢俾中國資金大舉去美國投資基建，唔係睇中國啦。過去美國對中資投資戰略性基礎設施(如碼頭)都比較抗拒，若然你放中資去美國投資基建，阿爺一定敢去，反正收咁多外匯買美債回報得2厘幾好低，加上人民幣又係印出來，怕乜投去美國搞基建呢？ 或者折衷一下，美國加入亞投行，改名後的亞投行唔止投資亞洲、投埋美洲亦得。
總之特朗普要錢唔係要面，對中國就易話為啦，中美關係，就可以出現「鬥而不破」的較佳狀態，說不定比奧巴馬年代硬要「重返亞洲」還要好。
你會問講咗咁耐同買股票有乜關係？我覺得有幾方面。第一，長線可看好中國經濟。早兩三年中國和美國經濟都唔好，真係驚兩國會打仗搵出路。到去年下半年開始中國經濟有少少見底feel，但特朗普11月當選，又驚中美打貿易戰。如今中美關係步入正常軌道，更有利中國全力發展經濟，所以可以看高一線。我話如果中國樓市有回調，真係可以揀大城市外圍地鐵就快到的地區，去買吓樓。或者一等大市深度回吐，就買派息好的內地房託股作為代替品。
第二，人民幣好難無底下跌。美國又話加息，聯儲局又話縮表，本有美元向上，人仔向下的風險。習近平和特朗普拍晒膊頭，兩國都唔會俾人仔跌太多，一年跌3、5個巴仙可以，跌得多就大加夾埋會做嘢，所以買中國資產的匯價風險略降。
第三，貿易股有反彈。「習特會」和氣收場，貿易股應該可以鬆一口氣，估計短期內，應該會炒吓反彈。而軍工股就無運行，近排反彈咗少少，恐怕還要下試低位。如中航科工(2357) ，現價彈返上5.49元，真係要跌到5.1元才好買，買唔到就算啦。
大摩叫減持金隅
另外近期比較熱炒的「雄安概念」概念。摩根士丹利發報告指出，在樂觀情況下，雄安的人口可能在10年內達到670萬，累計總投資達2.4萬億元人民幣，提振每年中國投資增速0.63個百分點，拉動中國GDP增速0.26至0.39個百分點。
睇完大摩的估計，以雄安新區頭10年總投資2.4萬億元人仔，平均一年投入2400億元，銀碼不算太驚人，不過對水泥及建材股有拉動的作用，大摩上星期五發報告估計京津冀地區未來15年每年水泥需求提高約8%，料冀東水泥為最受惠的水泥股份。
我覺得相關股份近期已經升了很多，恐怕未必可以持續炒作下去。以水泥股金隅(2009) 為例，受到消息刺激，股價在上周初勁升近五成至4.81元，之後回吐，到上星期五又反彈，收報4.6元。
要留意的是，大摩上周五決定將金隅剔出該行的亞太區、中港股票焦點名單，將金隅評級由「增持」降至「減持」。大摩咁做顯然係覺得金隅升突咗。以金隅現價18.6倍市盈率、息率0.4厘計，買金隅的唯一理由係炒。
雄安新區的大計非常好，估計很有機會成功落實，但相關股份一炒可能升突，透支了未來一段長時間的表現，高追一定要定好止蝕位，最怕股份回落時不懂得走人。
老虎仔咁易落疊?
另外，有線寬頻(1097) 的消息多多，大股東九倉話咗唔會再注資，去年12月應承借多4億畀有線，使晒就無。周末傳出有新投資者願意注資有線，有消息話有線管理層在上周五的內部會議上交代，話有永升洽談注資有線，有線一方叫價11億港元，永升只肯出9億港元，雙方仍就2億港元拉鋸。
傳出呢種有曙光的消息後，今日有線寬頻隨時又炒一炒，不過我勸大家咪跟，炒作會好短癮。有線有收費電視和免費電視兩個牌，個收費牌要在本月26日前答政府做唔做。九倉一方好急搵人入股，去年9月九倉老闆吳光正已搵人稱老虎仔的永升老闆邱達昌傾，老虎仔主要畀面吳光正，一直有去傾。
但有線呢個攤唔易執，特別係收費電視應該都無得做，公司又有2100人咁多，相當難搞，加上九倉唔係用賤價叫人入股，所以談極都談唔成，老虎仔數口咁精，邊有咁易落疊？而家仲有半個月就係死線，想炒有線第一個考慮係時間太趕唔易傾得成，第二即使傾成都係好低價，結論係唔太有得炒。若見隻股炒高搶入，就小心坐艇呀。
陸羽仁
金融High Tea 舊文
來源 source: http://hdfin.stheadline.com